തിരുവനന്തപുരം: സജി ചെറിയാനെ വീണ്ടും മന്ത്രിയാക്കാനുളള തീരുമാനം അധാര്മ്മികമാണെന്ന് പ്രതിപക്ഷ നേതാവ് വി ഡി സതീശന്. ഭരണഘടനാ ശില്പ്പികളെ അവഹേളിക്കുകയും ഭരണഘടനയെ കുന്തവും കൊടച്ചക്രവുമെന്ന് അധിക്ഷേപിക്കുകയും ചെയ്ത സജി ചെറിയാനെ വീണ്ടും മന്ത്രിയാക്കാനുളള സര്ക്കാരിന്റെ നീക്കത്തെ യുഡിഎഫ് അംഗീകരിക്കില്ലെന്നും സത്യപ്രതിജ്ഞ പ്രതിപക്ഷം ബഹിഷ്കരിക്കുമെന്നും വി ഡി സതീശന് പറഞ്ഞു.
'കോടതി കുറ്റവിമുക്തനാക്കാതെ സജി ചെറിയാനെ വീണ്ടും മന്ത്രിയാക്കുന്നതിനെ യുഡിഎഫ് ശക്തമായി എതിര്ക്കും. പൊലീസിന്റെ അന്വേഷണ റിപ്പോര്ട്ടില് ആഭ്യന്തര മന്ത്രികൂടിയായ മുഖ്യമന്ത്രി കൈകടത്തിയാണ് സജി ചെറിയാന് അനുകൂലമായ റിപ്പോര്ട്ട് ഉണ്ടാക്കിയത്. പൊലീസ് റിപ്പോര്ട്ട് സമര്പ്പിച്ച വിചാരണാകോടതി പോലും വിഷയത്തില് തീരുമാനമെടുത്തിട്ടില്ല. കേസ് ഹൈക്കോടതിയുടെ പരിഗണനയിലാണ്. ഈ സാഹചര്യത്തില് സജി ചെറിയാനെ മന്ത്രിയാക്കാന് സര്ക്കാര് ധൃതി കാട്ടുന്നത് എന്തിനാണ്? കോടതിയുടെ തീരുമാനത്തിന് വിധേയമായി മാത്രമേ സജി ചെറിയാന് മന്ത്രിയാകാന് സാധിക്കുകയുളളു'- വി ഡി സതീശന് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
നാളെ വൈകുന്നേരം നാലുമണിക്ക് രാജ്ഭവനില് നടക്കുന്ന ചടങ്ങിലാണ് സജി ചെറിയാന് വീണ്ടും മന്ത്രിയായി സത്യപ്രതിജ്ഞ ചെയ്യുക. സജി ചെറിയാനെതിരെ കോടതിയില് കേസുളളതിനാല് നിയമോപദേശം തേടിയതിനുശേഷമാണ് ഗവര്ണര് സത്യപ്രതിജ്ഞയ്ക്ക് അനുമതി നല്കിയത്. പത്തനംതിട്ടയിലെ മല്ലപ്പളളിയില് നടന്ന പാര്ട്ടി പരിപാടിയില് ഭരണഘടനാ വിരുദ്ധ പ്രസംഗം നടത്തിയതിന് ജൂലൈ ആറിനായിരുന്നു സജി ചെറിയാന് മന്ത്രിസ്ഥാനം രാജിവെച്ചത്.