ഡല്‍ഹി: ബിജെപി ഒരു മാധ്യമസ്ഥാപനത്തിനും വിലക്കേര്‍പ്പെടുത്തിയിട്ടില്ലെന്ന് കേന്ദ്ര പ്രതിരോധമന്ത്രി രാജ്‌നാഥ് സിംഗ്. ബിജെപി ആരുടെയും അഭിപ്രായ സ്വാതന്ത്ര്യത്തിനുളള അവകാശം വെട്ടിമാറ്റിയിട്ടില്ലെന്നും കോണ്‍ഗ്രസാണ് അഭിപ്രായ സ്വാതന്ത്ര്യം തടയാനായി ഭരണഘടന ഭേദഗതി ചെയ്തതെന്നും രാജ്‌നാഥ് സിംഗ് പറഞ്ഞു. ആര്‍എസ്എസിന്റെ പാഞ്ചജന്യ വാരിക സംഘടിപ്പിച്ച കോണ്‍ക്ലേവില്‍ സംസാരിക്കവേയാണ് അഭിപ്രായ സ്വാതന്ത്ര്യത്തെപ്പറ്റിയുളള മന്ത്രിയുടെ പ്രതികരണം.
'ഇന്ന് മാധ്യമസ്വാതന്ത്ര്യം ലംഘിക്കപ്പെടുകയാണ് എന്ന് ആരോപിക്കുന്നവര്‍, അടല്‍ ബിഹാരി വാജ്‌പേയി സര്‍ക്കാരോ നരേന്ദ്രമോദി സര്‍ക്കാരോ ഒരു മാധ്യമസ്ഥാപനത്തിനും നിരോധനമേര്‍പ്പെടുത്തിയിട്ടില്ലെന്നതും ആരുടെയും അഭിപ്രായസ്വാതന്ത്ര്യം ഇല്ലാതാക്കിയിട്ടില്ലെന്നതും മറക്കുന്നു. കോണ്‍ഗ്രസ് പാര്‍ട്ടിയുടെ മുഴുവന്‍ ചരിത്രവും നോക്കിയാല്‍ എല്ലാ സ്വാതന്ത്ര്യങ്ങളെയും അടിച്ചമര്‍ത്തിയത് അവരാണെന്ന് മനസിലാവും. അഭിപ്രായ സ്വാതന്ത്ര്യം തടയാനായി കോണ്‍ഗ്രസ് സര്‍ക്കാര്‍ ഭരണഘടന ഭേദഗതി ചെയ്തു'- രാജ്‌നാഥ് സിംഗ് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
1951-ലെ ആര്‍ട്ടിക്കിള്‍ 19 ഭേദഗതി ചൂണ്ടിക്കാണിച്ചായിരുന്നു മന്ത്രി കോണ്‍ഗ്രസിനെ വിമര്‍ശിച്ചത്. മാധ്യമങ്ങള്‍ ജനാധിപത്യത്തിന്റെ നാലാമത്തെ തൂണാണെന്നും മാധ്യമസ്വാതന്ത്ര്യം ശക്തവും ഊര്‍ജ്ജസ്വലവുമായ ജനാധിപത്യത്തിന് വളരെ പ്രധാനമാണെന്നും രാജ്‌നാഥ് സിംഗ് കൂട്ടിച്ചേര്‍ത്തു.
