തിരുവനന്തപുരം: യൂത്ത് ലീഗ് സംസ്ഥാന ജനറല് സെക്രട്ടറി പി കെ ഫിറോസിനെ അറസ്റ്റ് ചെയ്ത സംഭവത്തില് പ്രതികരണവുമായി പ്രതിപക്ഷ ഉപനേതാവ് പി കെ കുഞ്ഞാലിക്കുട്ടി. പി കെ ഫിറോസിന്റെ അറസ്റ്റിനുപിന്നില് രാഷ്ട്രീയ ലക്ഷ്യമാണെന്നും ജാമ്യം നല്കാതിരിക്കാനാണ് സര്ക്കാര് ശ്രമിക്കുന്നതെന്നും കുഞ്ഞാലിക്കുട്ടി പറഞ്ഞു. 'ജനകീയ സമരത്തെ അടിച്ചമര്ത്താനാണ് സര്ക്കാര് ശ്രമിക്കുന്നത്. മാര്ച്ചില് സംഘര്ഷമുണ്ടായപ്പോള് സമാധാനപരമായി കൈകാര്യം ചെയ്യാനാണ് ഫിറോസ് ശ്രമിച്ചത്. അറസ്റ്റില് പതറില്ല. അറസ്റ്റ് പുത്തരിയുമല്ല. വിഷയത്തെ നിയമപരമായി നേരിടും'- പി കെ കുഞ്ഞാലിക്കുട്ടി പറഞ്ഞു.
പി കെ ഫിറോസിന്റെ അറസ്റ്റ് ഭരണകൂട ഭീകരതയാണെന്ന് മുതിര്ന്ന കോണ്ഗ്രസ് നേതാവ് രമേശ് ചെന്നിത്തല പറഞ്ഞു. അറസ്റ്റിനെതിരെ സംസ്ഥാനത്ത് അതിശക്തമായ പ്രതിഷേധമുയരുമെന്നും യുഡിഎഫ് നിയമനടപടി സ്വീകരിക്കുമെന്നും ചെന്നിത്തല കൂട്ടിച്ചേര്ത്തു. സെക്രട്ടറിയേറ്റ് മാര്ച്ചിലെ സംഘര്ഷവുമായി ബന്ധപ്പെട്ടാണ് പികെ ഫിറോസിനെ പൊലീസ് അറസ്റ്റ് ചെയ്തത്. പൊലീസിനെ ആക്രമിക്കല്, പൊതുമുതല് നശിപ്പിക്കല് എന്നീ വകുപ്പുകള് ചുമത്തിയായിരുന്നു അറസ്റ്റ്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കഴിഞ്ഞ ദിവസം യൂത്ത് ലീഗ് സംഘടിപ്പിച്ച സെക്രട്ടറിയേറ്റ് മാര്ച്ചിലാണ് പൊലീസും പ്രവര്ത്തകരും തമ്മില് സംഘര്ഷമുണ്ടായത്. മാര്ച്ച് അക്രമാസക്തമായതോടെ പൊലീസ് ഗ്രനേഡും കണ്ണീര് വാതകവും പ്രയോഗിച്ചു. നിരവധിപേര്ക്കാണ് സംഘര്ഷത്തില് പരിക്കേറ്റത്. നിലവില് 28 യൂത്ത് ലീഗ് പ്രവര്ത്തകര് റിമാന്ഡിലാണ്.