ചെന്നൈ: തമിഴ്നാട്ടില് 'സിഎം ഓണ് ഫീല്ഡ് വിസിറ്റ്' (CM on Field Visit) പരിപാടിക്ക് തുടക്കംകുറിച്ച് ഡിഎംകെ സര്ക്കാര്. ജനങ്ങള്ക്കായുളള ക്ഷേമപദ്ധതികളുടെയും മറ്റ് വികസന പദ്ധതികളുടെയും നടത്തിപ്പ് സംബന്ധിച്ച് വിശദമായ അവലോകനം നടത്തുകയാണ് പരിപാടിയുടെ ലക്ഷ്യം. സര്ക്കാര് പദ്ധതികളുടെ ആനുകൂല്യങ്ങള് ജനങ്ങള്ക്ക് കൃത്യമായി ലഭ്യമാകുന്നുണ്ടോ എന്നറിയാനും പരിപാടി സഹായിക്കും. ഫീല്ഡ് വിസിറ്റിന് മുഖ്യമന്ത്രിക്കൊപ്പം ബന്ധപ്പെട്ട വകുപ്പ് മന്ത്രിമാരും ഉദ്യോഗസ്ഥരുമാണുണ്ടാവുക.
കുടിവെളളം, ശുചിത്വം, റോഡുകള്, അടിസ്ഥാന സൗകര്യങ്ങള്, നൈപുണ്യ വികസനം, ഗ്രാമ നഗര വികസനം, വിദ്യാഭ്യാസം, ആരോഗ്യം, കുട്ടികളുടെ പോഷകാഹാരം തുടങ്ങിയ സേവനങ്ങളുമായി ബന്ധപ്പെട്ട പദ്ധതികള് പരിശോധിക്കുമെന്നാണ് സംസ്ഥാന സര്ക്കാര് പുറത്തിറക്കിയ പത്രക്കുറിപ്പില് പറയുന്നത്. ഫെബ്രുവരി ഒന്നിനാണ് സിഎം ഓണ് ഫീല്ഡ് വിസിറ്റ് പരിപാടിക്ക് തുടക്കംകുറിക്കുക. ഫെബ്രുവരി ഒന്ന്, രണ്ട് തിയതികളിലായി മുഖ്യമന്ത്രി എംകെ സ്റ്റാലിന് റാണിപ്പേട്ട്, വെല്ലൂര്, തിരുപ്പത്തൂര്, തിരുവണ്ണാമലൈ എന്നീ ജില്ലകള് സന്ദര്ശിക്കും.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഈ ദിവസങ്ങളില് മുഖ്യമന്ത്രി കര്ഷക സംഘടനകള്, സ്വാശ്രയ സംഘങ്ങള്, വ്യവസായ സംഘങ്ങള് എന്നിവരുടെ പ്രതിനിധികളുമായി കൂടിക്കാഴ്ച്ച നടത്തും. ജില്ലകളിലെ ക്രമസമാധാന നില സംബന്ധിച്ച് ജില്ലകളിലെ ഉന്നത പൊലീസ് ഉദ്യോഗസ്ഥരുമായും യോഗം ചേരും. അന്നേദിവസം ഡിഎംകെ മന്ത്രിമാരും അതത് ജില്ലകളിലെ പദ്ധതികള് നടപ്പിലാക്കാന് ചുമതലപ്പെട്ട വകുപ്പ് സെക്രട്ടറിമാരും അവലോകന യോഗം നടത്തും. മുഖ്യമന്ത്രിയുടെ അധ്യക്ഷതയില് ജില്ലാ കളക്ടര്മാരുമായി ചേരുന്ന യോഗത്തില് ശേഖരിച്ച വിവരങ്ങള് ചര്ച്ച ചെയ്യുകയും വേണ്ട നടപടികളെടുക്കുകയും ചെയ്യും.