തിരുവനന്തപുരം: ഭാരത് ജോഡോ യാത്രയ്ക്കുശേഷം ഇന്ത്യ പുതിയൊരു രാഹുലിനെ കണ്ടെത്തിയെന്ന് മുതിര്‍ന്ന കോണ്‍ഗ്രസ് നേതാവ് എ കെ ആന്റണി. എല്ലാവരെയും ചേര്‍ത്തുപിടിച്ചാണ് രാഹുല്‍ ഗാന്ധി ഭാരത് ജോഡോ യാത്ര നടത്തിയതെന്നും ഇതുപോലൊരു യാത്ര ഇതിനുമുന്‍പ് ഇന്ത്യ കണ്ടിട്ടില്ലെന്നും എ കെ ആന്റണി പറഞ്ഞു. തിരുവനന്തപുരത്ത് കെപിസിസി ഓഫീസില്‍ മഹാത്മാഗാന്ധിയുടെ രക്തസാക്ഷിത്വ ദിനാചരണത്തിനുശേഷം സംസാരിക്കുകയായിരുന്നു അദ്ദേഹം.
'ഭാരത് ജോഡോ യാത്ര പൂര്‍ത്തിയായപ്പോള്‍ ഇന്ത്യ പുതിയൊരു രാഹുല്‍ ഗാന്ധിയെ കണ്ടെത്തി. പുതിയ രാഹുല്‍ ഗാന്ധിയുണ്ടായിരിക്കുന്നു. അദ്ദേഹം ഇന്ത്യയെ കണ്ടെത്തിയിരിക്കുന്നു. ഇന്ത്യയില്‍ വെറുപ്പും വിദ്വേഷവും വളര്‍ന്നുവരികയാണ്. അപ്പോഴാണ് അദ്ദേഹം എല്ലാ ജനവിഭാഗങ്ങളെയും ചേര്‍ത്തുനിര്‍ത്തി ഭാരത് ജോഡോ യാത്ര നടത്തിയത്. രാജ്യത്ത് വെറുപ്പ് വിതയ്ക്കുന്നവരെ 2024-ലെ തെരഞ്ഞെടുപ്പില്‍ പിഴുതെറിയണം. അപ്പോഴേ ഈ യാത്ര പൂര്‍ണമാവുകയുളളു'- എ കെ ആന്റണി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ബിജെപിയെ ഇല്ലാതാക്കാന്‍ കോണ്‍ഗ്രസിനുമാത്രം സാധിക്കില്ല എന്നറിയുന്നതുകൊണ്ടാണ് സഹകരിക്കാന്‍ തയാറുളളവരെ കശ്മീരിലേക്ക് ക്ഷണിച്ചതെന്നും എ കെ ആന്റണി പറഞ്ഞു. 'ജനാധിപത്യമാര്‍ഗത്തിലൂടെ വേണം അവരെ തോല്‍പ്പിക്കാന്‍. അതിന് കോണ്‍ഗ്രസ് മാത്രം പോരാ എന്നറിയാം. ലക്ഷ്യം നേടാനായി കോണ്‍ഗ്രസിനൊപ്പം നില്‍ക്കാന്‍ തയാറുളളവരെ കശ്മീരിലേക്ക് ക്ഷണിച്ചു. കുറേപ്പേരെത്തി, കുറച്ചുപേരെത്തിയില്ല. അവരും നാളെ കോണ്‍ഗ്രസിനൊപ്പം ചേരുമെന്ന് പ്രതീക്ഷിക്കാം'- എ കെ ആന്റണി കൂട്ടിച്ചേര്‍ത്തു.
