ചെന്നൈ: ഗായിക വാണി ജയറാം (77) അന്തരിച്ചു. ചെന്നൈയിലെ വസതിയില്വെച്ചായിരുന്നു അന്ത്യം. കുഴഞ്ഞുവീണ വാണിയെ ആശുപത്രിയിലെത്തിച്ചെങ്കിലും മരണം സംഭവിക്കുകയായിരുന്നു. തമിഴ്, തെലുങ്ക്, കന്നഡ, മലയാളം, മറാത്തി, ഹിന്ദി തുടങ്ങിയ നിരവധി ഇന്ത്യന് ഭാഷകളിലായി പതിനായിരത്തിലേറേ ഗാനങ്ങള് ആലപിച്ചിട്ടുണ്ട്. കലൈവാണി എന്നാണ് യഥാര്ത്ഥ പേര്. മികച്ച ഗായികയ്ക്കുളള ദേശീയ ചലച്ചിത്ര പുരസ്കാരം മൂന്നുതവണ നേടിയിട്ടുണ്ട്. ഈ വര്ഷത്തെ പത്മഭൂഷണ് അവാര്ഡും വാണി ജയറാമിന് ലഭിച്ചിരുന്നു.
തമിഴ്നാട്ടിലെ വെല്ലൂരില് 1945 നവംബര് മുപ്പതിനാണ് വാണി ജയറാം ജനിച്ചത്. അമ്മയില്നിന്നാണ് സംഗീതത്തിന്റെ ആദ്യ പാഠങ്ങള് വാണി പഠിച്ചത്. ഏഴാം വയസില് ആകാശവാണിയുടെ മദ്രാസ് സ്റ്റേഷനില് പാടാന് തുടങ്ങി. കടലൂര് ശ്രീനിവാസ അയ്യങ്കാര്, ടി ആര് ബാലസുബ്രമണ്യം, ആര് എസ് മണി എന്നിവരായിരുന്നു കര്ണാടിക് സംഗീതത്തില് വാണിയുടെ ഗുരുക്കന്മാര്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
1971-ല് വസന്ത് ദേശായിയുടെ സംഗീതത്തില് ഗുഡ്ഡി എന്ന സിനിമയിലെ ബോലേ രേ പപ്പി എന്ന ഗാനത്തിലൂടെയാണ് വാണി ജയറാം പ്രശസ്തയായത്. 1974-ല് ചെന്നൈയിലേക്ക് താമസം മാറിയതോടെയാണ് ദക്ഷിണേന്ത്യന് ഭാഷകളില് സജീവമാകുന്നത്. സലീല് ചൗധരിയാണ് വാണിയെ മലയാളത്തില് അവതരിപ്പിക്കുന്നത്. 2017-ല് പുറത്തിറങ്ങിയ മോഹന്ലാല് ചിത്രം പുലിമുരുഗനിലെ മാനത്തെ മാരിക്കുറുമ്പേ, നിവിന് പോളി ചിത്രം ആക്ഷന് ഹീറോ ബിജുവിലെ പൂക്കള് പനിനീര് പൂക്കള്, 1983 എന്ന ചിത്രത്തിലെ ഓലഞ്ഞാലിക്കുരുവീ എന്നിവയാണ് വാണി മലയാളത്തില് അവസാനമായി പാടിയ ഗാനങ്ങള്.