ഷില്ലോങ്ങ്; ഓരോ സംസ്ഥാനത്തും കോണ്ഗ്രസ് തോല്ക്കുമ്പോള് ഞങ്ങള് വീട്ടിലിരുന്ന് ബിജെപിയുടെ വിജയം കാണുകയാണൊ വേണ്ടത് എന്ന് തൃണമുല് കോണ്ഗ്രസ് നേതാവ് മഹുവ മൊയ്ത്ര എം പി ചോദിച്ചു. രാഹുല് ഗാന്ധിയുടെ തൃണമുല് വിമര്ശനത്തിന് മേഘാലയാ തലസ്ഥാനമായ ഷില്ലോങ്ങില് മറുപടി പറയുകയായിരുന്നു അവര്. കോണ്ഗ്രസിന് ബിജെപിയെ തോല്പ്പിക്കാനാകുമായിരുന്നുവെങ്കില് തെരഞ്ഞെടുപ്പില് തൃണമുല് കോണ്ഗ്രസിന്റെ ആവശ്യമേയുണ്ടായിരുന്നില്ല. കോണ്ഗ്രസ് പരാജയപ്പെട്ടതോടെയാണ് തൃണമുല് കോണ്ഗ്രസ് ബദലായി വന്നത്- മഹുവ മൊയ്ത്ര പറഞ്ഞു.
മേഘലയാ തെരഞ്ഞെടുപ്പില് തൃണമുല് കോണ്ഗ്രസ് മത്സരിക്കുന്നത് ബിജെപിയുടെ വിജയത്തിന് കാരണമാകുമെന്ന രാഹുല് ഗാന്ധിയുടെ വിമര്ശനമാണ് മഹുവ മൊയ്ത്രയുടെ പ്രതികരണത്തിന് കാരണമായത്. തൃണമുല് കോണ്ഗ്രസ് ഭരിക്കുന്ന പശ്ചിമ ബംഗാളിലെ അക്രമസംഭവങ്ങളും അഴിമതിയും എടുത്തുപറഞ്ഞുകൊണ്ടുള്ള രാഹുലിന്റെ വിമര്ശനമാണ് മഹുവയെ ചൊടിപ്പിച്ചത്. മതനിരപേക്ഷ പാര്ട്ടികളുടെ വോട്ടുകള് ഭിന്നിക്കാതിരിക്കണമെന്നും ബിജെപിയുടെ പരാജയം ഉറപ്പുവരുത്തണമെന്നും ഷില്ലോങ്ങില് നടന്ന ആദ്യ തെരഞ്ഞെടുപ്പ് യോഗത്തില് രാഹുല് ഗാന്ധി പറഞ്ഞു.
2024- ല് നടക്കുന്ന പൊതുതെരെഞ്ഞെടുപ്പില് രാജ്യത്തെ മതനിരപേക്ഷ കക്ഷികളുടെ ഐക്യം ഉറപ്പുവരുത്തുമെന്നും അതിനായി പ്രതിപക്ഷത്തെ പ്രധാനകക്ഷികളുമായി ചര്ച്ച ആരംഭിച്ചതായും കോണ്ഗ്രസ് അധ്യക്ഷന് മല്ലികാര്ജ്ജുന് ഖാര്ഗെ കഴിഞ്ഞ ദിവസം വ്യക്തമാക്കിയിരുന്നു.