തിരുവന്തപുരം: സ്വര്‍ണ്ണക്കടത്തുകേസ് പ്രതി സ്വപ്‌നാ സുരേഷിനും വിജേഷ് പിളളയ്ക്കും വക്കീല്‍ നോട്ടീസയച്ച് സിപിഎം സംസ്ഥാന സെക്രട്ടറി എംവി ഗോവിന്ദന്‍. ഒരു കോടി രൂപാ നഷ്ടപരിഹാരം ആവശ്യപ്പെട്ടാണ് നോട്ടീസയച്ചിരിക്കുന്നത്. സ്വപ്‌ന അപകീര്‍ത്തിപരമായ പരാമര്‍ശമാണ് നടത്തിയതെന്നും മാധ്യമങ്ങളിലൂടെ മാപ്പുപറഞ്ഞില്ലെങ്കില്‍ സിവില്‍, ക്രിമിനല്‍ നിയമപ്രകാരം നടപടി സ്വീകരിക്കുമെന്നും നോട്ടീസില്‍ പറയുന്നു. 'സ്വപ്‌നയുടെ ആരോപണം വസ്തുതാവിരുദ്ധവും തെറ്റുമാണ്. എനിക്കോ എന്റെ കുടുംബത്തിനോ വിജേഷ് പിളള എന്നയാളെ അറിയില്ല. ആരോപണം പിന്‍വലിച്ച് മാപ്പുപറഞ്ഞില്ലെങ്കില്‍ നിയമനടപടികള്‍ സ്വീകരിക്കും'-എന്നാണ് എംവി ഗോവിന്ദന്‍ തളിപ്പറമ്പിലെ അഭിഭാഷകന്‍ മുഖേന അയച്ച നോട്ടീസില്‍ പറയുന്നത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
മുഖ്യമന്ത്രി പിണറായി വിജയനും കുടുംബത്തിനുമെതിരെ ഉന്നയിച്ച ആരോപണങ്ങള്‍ പിന്‍വലിക്കാന്‍ വിജേഷ് പിളള എന്നയാള്‍ മുഖേന ഭീഷണിപ്പെടുത്തിയെന്നും ബാംഗ്ലൂര്‍ വിട്ടുപോകാന്‍ പണം വാഗ്ദാനം ചെയ്‌തെന്നുമാണ് സ്വപ്‌നാ സുരേഷ് വെളിപ്പെടുത്തിയത്. ഒത്തുതീര്‍പ്പിന് വഴങ്ങിയില്ലെങ്കില്‍ ആയുസിന് ദോഷം വരുമെന്ന് എംവി ഗോവിന്ദന്‍ പറഞ്ഞതായി വിജേഷ് പിളള പറഞ്ഞെന്നും സ്വപ്‌ന ആരോപിച്ചിരുന്നു. വെളിപ്പെടുത്തലിനുപിന്നാലെ സ്വപ്‌നക്കെതിരെ നിയമനടപടി സ്വീകരിക്കുമെന്ന് എംവി ഗോവിന്ദന്‍ പറഞ്ഞിരുന്നു. അതിന്റെ ഭാഗമായാണ് വക്കീല്‍നോട്ടീസയച്ചിരിക്കുന്നത്.
