കോഴിക്കോട്: കോഴിക്കോട്ട് കെ മുരളീധരനെ പിന്തുണച്ച് ഫ്‌ളക്‌സ് ബോര്‍ഡുകള്‍. 'നിങ്ങള്‍ക്കുവേണ്ടെങ്കിലും കേരള ജനത ഒറ്റക്കെട്ടായി പറയുന്നു, ഞങ്ങള്‍ക്കുവേണം ഈ നേതാവിനെ'- എന്നെഴുതിയ ഫ്‌ളക്‌സ് ബോര്‍ഡുകളാണ് കോഴിക്കോട് നഗരത്തിന്റെ വിവിധ ഭാഗങ്ങളില്‍ പ്രത്യക്ഷപ്പെട്ടിരിക്കുന്നത്. കോണ്‍ഗ്രസ് പോരാളികള്‍ എന്നും ഫ്‌ളക്‌സില്‍ എഴുതിയിട്ടുണ്ട്. കെ മുരളീധരന് പാര്‍ട്ടിയെ പരസ്യമായി വിമര്‍ശിച്ചതിന്റെ പേരില്‍ കെപിസിസി അധ്യക്ഷന്റെ മുന്നറിയിപ്പ് നോട്ടീസ് ലഭിച്ചിരുന്നു. അതിനുപിന്നാലെ താനിനി ഒരു തെരഞ്ഞെടുപ്പിലും മത്സരിക്കുന്നില്ലെന്ന് അദ്ദേഹം പ്രഖ്യാപിച്ചു. ഈ പശ്ചാത്തലത്തിലാണ് മുരളീധരനെ അനുകൂലിച്ചുളള ഫ്‌ളക്‌സ് ബോര്‍ഡുകള്‍ നഗരത്തില്‍ പ്രത്യക്ഷപ്പെട്ടത്.
പാര്‍ട്ടിക്കെതിരെ പരസ്യവിമര്‍ശനം നടത്തിയതിനാണ് കെ മുരളീധരനും എംകെ രാഘവനും കെപിസിസി നേതൃത്വം നോട്ടീസ് നല്‍കിയത്. പാര്‍ട്ടിയെ മോശമായി ചിത്രീകരിക്കുന്ന പരസ്യപ്രസ്താവനകള്‍ പാടില്ലെന്ന കര്‍ശന നിര്‍ദേശമാണ് എംകെ രാഘവന് നല്‍കിയത്. പ്രസ്താവനകള്‍ പാര്‍ട്ടിയെ ദോഷകരമായി ബാധിക്കുന്നുണ്ടെന്നും ജാഗ്രത പുലര്‍ത്തണമെന്നുമാണ് കെ മുരളീധരന് ലഭിച്ച നോട്ടീസില്‍ പറയുന്നത്. അതിനുപിന്നാലെ തനിക്ക് നോട്ടീസ് നല്‍കിയത് ബോധപൂര്‍വ്വം അപമാനിക്കാനാണെന്നും ലോക്‌സഭയിലേക്കും രാജ്യസഭയിലേക്കും മത്സരിക്കാന്‍ താനില്ലെന്നും മുരളീധരന് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഉപയോഗിച്ച ശേഷം വലിച്ചെറിയുന്ന രീതിയാണ് പാര്‍ട്ടിക്കുളളതെന്നാണ് എംകെ രാഘവന് പൊതുവേദിയില്‍ പറഞ്ഞത്. സ്ഥാനവും മാനവും വേണമെങ്കില്‍ മിണ്ടാതിരിക്കണം എന്നതാണ് ഇപ്പോഴത്തെ അവസ്ഥയെന്നും പാര്‍ട്ടിയില്‍ വിയോജിപ്പും വിമര്‍ശനവും നടത്താന്‍ പറ്റാത്ത സ്ഥിതിയാണുളളതെന്നും എം കെ രാഘവന് പറഞ്ഞിരുന്നു. രാഘവന്റെ പരാമര്‍ശം വിവാദമായതോടെ പിന്തുണയുമായി മുരളീധരന് രംഗത്തെത്തി. അദ്ദേഹം പറഞ്ഞത് പ്രവര്‍ത്തകരുടെ പൊതുവികാരമാണെന്നും വിമര്‍ശനത്തില്‍ തെറ്റില്ലെന്നും മുരളീധരന് പറഞ്ഞു. ഇതോടെയാണ് നേതൃത്വം ഇരുവര്‍ക്കുമെതിരെ നടപടിയെടുത്തത്.
