കൊച്ചി: സഭാ ഭൂമി ഇടപാട് കേസില് കര്ദ്ദിനാള് മാര് ജോര്ജ് ആലഞ്ചേരിക്ക് തിരിച്ചടി. കേസുകള് റദ്ദാക്കണമെന്ന കര്ദിനാളിന്റെ ഹര്ജി സുപ്രീം കോടതി തള്ളി. ജസ്റ്റിസുമാരായ ദിനേശ് മഹേശ്വരി, ബേല എം ത്രിവേദി എന്നിവരടങ്ങിയ ബഞ്ചാണ് വാദം കേട്ടത്. കാക്കനാട് മജിസ്ട്രേറ്റ് കോടതിയിലുള്ള കേസുകളിലെ നടപടികള് റദ്ദാക്കണമെന്നാവശ്യപ്പെട്ടാണ് കര്ദിനാള് കോടതിയെ സമീപിച്ചത്.
എറണാകുളം അങ്കമാലി അതിരൂപതയുടെ ഉടമസ്ഥതയില് കാക്കനാടുള്ള 60 സെന്റ് ഭൂമി ഇടപാടിലൂടെ സഭയ്ക്ക് ലക്ഷങ്ങളുടെ നഷ്ടം ഉണ്ടായെന്നും സഭയുടെ വിവിധ സമിതികളിൽ ആലോചിക്കാതെയാണ് ഭൂമി ഇടപാട് നടത്തിയതെന്നുമാണ് കേസ്. കർദിനാള് മാർ ജോർജ് ആലഞ്ചേരി അടക്കം 24 പേരാണ് കേസിലെ പ്രതികൾ. ഇടനിലക്കാരും ഭൂമി വാങ്ങിയവരും പ്രതിപ്പട്ടികയിലുണ്ട്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
അതേസമയം, സഭാ ഭൂമി ഇടപാട് കേസില് കര്ദ്ദിനാള് മാര് ജോര്ജ് ആലഞ്ചേരിക്ക് സര്ക്കാര് ക്ലീന് ചിറ്റ് നല്കിയിരുന്നു. ഭൂമി ഇടപാടില് നിയമവിരുദ്ധമായി ഒന്നും നടന്നിട്ടില്ലെന്നും കാനോന് നിയമപ്രകാരമാണ് ഇടപാടുകള് നടന്നിരിക്കുന്നതെന്നുമാണ് സര്ക്കാര് സുപ്രീംകോടതിയെ അറിയിച്ചത്. ഭൂമി ഇടപാട് കേസുമായി ബന്ധപ്പെട്ട് പൊലീസും ജോര്ജ് ആലഞ്ചേരിക്ക് ക്ലീന് ചിറ്റ് നല്കിയിരുന്നു.