കാഠ്മണ്ഡു: കാഠ്മണ്ഡുവില് നിന്നും പുറപ്പെട്ട ദുബായ് വിമാനത്തിന് തീ പിടിച്ചു. പറന്നുയർന്ന വിമാനത്തിനാണ് തീ പിടിച്ചത്. 169 യാത്രക്കാരായിരുന്നു വിമാനത്തിലുണ്ടായിരുന്നത്. യാത്രക്കാരെല്ലാം സുരക്ഷിതരാണെന്ന് ഉദ്യോഗസ്ഥര് അറിയിച്ചു. വിമാനത്തിന് തീ പിടിച്ചതിന് പിന്നാലെ അധികൃതർ പരിഭ്രാന്തിയിലായെങ്കിലും നിലവിൽ തകരാർ പരിഹരിച്ച് വിമാനം ദുബായിലേക്ക് തന്നെ യാത്രയായിട്ടുണ്ട്.
വിമാനത്തിന്റെ എൻജിനുകളിൽ ഒന്നിന് തകരാർ സംഭവിക്കുകയായിരുന്നുവെന്നാണ് വിവരം. സംഭവുമായി ബന്ധപ്പെട്ട കൂടുതല് വിവരങ്ങള് ഇതുവരെ പുറത്തുവന്നിട്ടില്ല. സംഭവത്തെക്കുറിച്ച് അന്വേഷിക്കുമെന്നും ഇത്തരം അനിഷ്ട സംഭവങ്ങള് ഇനിയുണ്ടാകാതിരിക്കാന് ശ്രദ്ധിക്കുമെന്നും നേപ്പാൾ സിവിൽ ഏവിയേഷൻ അതോറിറ്റി ഡെപ്യൂട്ടി ഡയറക്ടർ പറഞ്ഞതായി മാധ്യമങ്ങൾ റിപ്പോർട്ട് ചെയ്തു. വിമാനത്തിന് തീപിടിച്ച വിവരമറിഞ്ഞ് സർവീസുകൾ നിർത്തിവച്ച ത്രിഭുവൻ രാജ്യാന്തര വിമാനത്താവളത്തിൽ പ്രവർത്തനം പുനരാരംഭിച്ചതായി അധികൃതർ അറിയിച്ചു.