ബാംഗ്ലൂര്‍: കുറഞ്ഞ ഓവര്‍ നിരക്കിന് പിഴ ലഭിച്ച് ബാംഗ്ലൂര്‍ റോയല്‍സ് ചലഞ്ചേഴ്സ് നായകൻ വിരാട് കോഹ്‍ലി. ബംഗളൂരു ചിന്നസ്വാമി സ്റ്റേഡിയത്തിൽ രാജസ്ഥാൻ റോയൽസിനെതിരായ മത്സരത്തിലാണ് കുറഞ്ഞ ഓവര്‍ നിരക്കിന്‍റെ പേരില്‍ കോഹ്ലിയ്ക്ക് പിഴ ചുമത്തിയിരിക്കുന്നത്. കുറഞ്ഞ ഓവർ നിരക്കിന് ബാംഗ്ലൂർ ടീമിന് ലഭിക്കുന്ന രണ്ടാം പിഴയാണിത്. കോഹ്ലിയ്ക്ക് പുറമേ സഹതാരങ്ങളും പിഴ അടക്കണമെന്ന് ബി സി സി ഐ അറിയിച്ചു. മറ്റു താരങ്ങൾക്ക് ഓരോരുത്തർക്കും ആറു ലക്ഷം രൂപയോ മാച്ച് ഫീയുടെ 25 ശതമാനമോ പിഴയായി അടക്കേണ്ടി വരും.
അതേസമയം, ഗുജറാത്ത് ടൈറ്റന്‍സ് നായകന്‍ ഹാര്‍ദിക് പാണ്ഡ്യക്കും രാജസ്ഥാന്‍ റോയല്‍സ് ക്യാപ്റ്റന്‍ സഞ്ജു സാംസണിനും കുറഞ്ഞ ഓവര്‍ നിരക്കിന്‍റെ പേരില്‍ ബിസിസി ഐ പിഴ ചുമത്തിയിരുന്നു. ഇരുവരും 12ലക്ഷം രൂപ അടക്കണമെന്നാണ് ബിസിസിഐ നിര്‍ദ്ദേശിച്ചത്. മൂന്ന് മണിക്കൂറും 20 മിനുട്ടുമാണ് ഒരു ഐ.പി.എല്‍ മത്സരത്തിന് അനുവദിച്ചിരിക്കുന്ന സമയം. ഈ സമയത്തിനുള്ളില്‍ കളി അവസാനിപ്പിക്കണമെന്നാണ് നിയമം.
