പാരീസ്: സസ്പെന്‍ഷന് ശേഷം ക്ലബിലേക്ക് തിരിച്ചെത്തിയ ഫുട്ബോള്‍ ഇതിഹാസം ലയണല്‍ മെസ്സിയെ അപമാനിച്ച് പി എസ് ജി ആരാധകര്‍. അയാസിയോയ്ക്കെതിരായ ലീഗ് വണ്‍ മത്സരത്തിലാണ് മെസ്സിയെ പി എസ് ജി ആരാധകര്‍ അപമാനിച്ചത്. മെസ്സിക്ക് പന്ത് കിട്ടുമ്പോഴെല്ലാം പി എസ് ജി ആരാധകര്‍ കൂകിവിളിച്ചു. മത്സരത്തില്‍ ടീം അഞ്ച് ഗോള്‍ നേടിയെങ്കിലും മെസ്സിക്ക് ഗോള്‍ നേടാന്‍ സാധിച്ചില്ല. മെസ്സിക്കെതിരെ പി എസ് ജി ആരാധകര്‍ കൂകി വിളിക്കുന്നതിന്‍റെ വീഡിയോ സാമൂഹിക മാധ്യമങ്ങളില്‍ വൈറലാണ്.
അതേസമയം, ആരാധകരുടെ ഭാഗത്തുനിന്നുമുണ്ടായ സമീപനം കളിയെ സാരമായി ബാധിച്ചുവെന്ന് പി എസ് ജി താരം റെനാറ്റോ സാഞ്ചസ് പറഞ്ഞതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട്‌ ചെയ്തു. മത്സരത്തില്‍ കിലിയന്‍ എംബാപ്പെ രണ്ട് ഗോള്‍ നേടി. 47, 54 മിനിറ്റുകളിലാണ് എംബാപ്പെ ഗോള്‍ നേടിയത്. ഫാബിയന്‍ റൂയിസ്,ഹക്കീമി എന്നിവരും ഗോള്‍ നേടി.
ക്ലബിന്‍റെ അനുമതിയില്ലാതെ സൗദി അറേബ്യ സന്ദർശിച്ചതിന്റെ പേരിലാണ് മെസിയെ സസ്പെന്‍ഡ് ചെയ്തത്. സൗദി അറേബ്യയുടെ ടൂറിസം അബാസഡറാണ് ലയണൽ മെസി. ഇതിനിടെ മെസ്സി സൗദി ക്ലബ്ബില്‍ ചേരുമെന്ന തരത്തില്‍ വാര്‍ത്തകള്‍ പുറത്തുവന്നിരുന്നു. എന്നാല്‍ അത്തരം വാര്‍ത്തകള്‍ തെറ്റാണെന്നും അല്‍- ഹിലാലുമായി മെസ്സി കരാര്‍ ഒപ്പിട്ടിട്ടില്ലെന്നും പിതാവ് അറിയിച്ചിരുന്നു.
