കൊച്ചി: ഇന്ത്യന്‍ ക്രിക്കറ്റില്‍ തലമുറമാറ്റത്തിന്‍റെ സമയമാണിതെന്ന് നടന്‍ പൃഥ്വിരാജ്. ഐപിഎല്‍ രണ്ടാം ക്വാളിഫയറില്‍ മുംബൈ ഇന്ത്യന്‍സിനെ തകര്‍ത്ത് തരിപ്പണമാക്കിയ ശുഭ്മാന്‍ ഗില്ലിന്‍റെ പ്രകടനത്തിന് പിന്നാലെയാണ് താരത്തിനെ പ്രശംസിച്ച് പൃഥ്വിരാജ് രംഗത്തെത്തിയത്. ലസിത് മലിംഗയെന്ന ശ്രീലങ്കന്‍ ഇതിഹാസത്തെ ബാറ്റിംഗിലൂടെ പരാജയപ്പെടുത്തിയ 23കാരന്‍ വിരാട് കോഹ്ലിയെപ്പോലെ മറ്റൊരു 23കാരന്‍. ശുഭ്മാന്‍ ഗില്‍ ഇന്ത്യന്‍ ക്രിക്കറ്റില്‍ തലമുറമാറ്റത്തിന്‍റെ പുതിയ മുഖമാകുന്നുവെന്ന് പൃഥ്വിരാജ് ട്വിറ്ററില്‍ കുറിച്ചു.
2012ല്‍ ഓസ്ട്രേലിയയില്‍ നടന്ന മത്സരത്തില്‍ 40 ഓവറില്‍ 321 റണ്‍സ് വിജയലക്ഷ്യം പിന്തുടര്‍ന്ന ഇന്ത്യക്കായി 133 റണ്‍സടിച്ച കോഹ്ലി മലിംഗയുടെ ഒരോവറില്‍ 24 റണ്‍സടിച്ച് ഇന്ത്യയെ ഫൈനലില്‍ എത്തിച്ചിരുന്നു. ഏകദിന ക്രിക്കറ്റില്‍ വിരാട് കോഹ്ലിയുടെ വരവറിയിച്ച ഇന്നിംഗ്സായിരുന്നു അത്. ഇക്കാര്യം ചൂണ്ടിക്കാട്ടിയാണ് പൃഥ്വിരാജ് ട്വീറ്റ് ചെയ്തത്.
അതേസമയം, മുംബൈ ഇന്ത്യന്‍സിനെതിരെ 60 പന്തില്‍ 129 റണ്‍സാണ് ഗില്‍ നേടിയത്. ഇതോടെ ഈ സീസണില്‍ ഗില്‍ നേടുന്ന മൂന്നാം സെഞ്ചുറിയാണിത്. ഏഴ് ഫോറും 10 സിക്സും അടങ്ങുന്നതാണ് ഗില്ലിന്‍റെ ഇന്നിംഗ്സ്. 32 പന്തില്‍ അര്‍ധസെഞ്ചുറി തികച്ച ഗില്‍ അടുത്ത 17 പന്തില്‍ സെഞ്ചുറിയിലെത്തി. 49 പന്തിലാണ് ഗില്‍ സെഞ്ചുറി തികച്ചത്.
