ആലപ്പുഴ: കൈക്കൂലി വാങ്ങുന്ന സര്ക്കാര് ഉദ്യോഗസ്ഥരെ രൂക്ഷമായി വിമര്ശിച്ച് സാംസ്കാരിക വകുപ്പ് മന്ത്രി സജി ചെറിയാന്. ന്യായമായ ശമ്പളം കിട്ടുമ്പോളും എന്തിനാണ് സര്ക്കാര് ഉദ്യോഗസ്ഥര് നക്കാപ്പിച്ചാ വാങ്ങാന് പോകുന്നത് എന്നാണ് സജി ചെറിയാന് ചോദിക്കുന്നത്. ഇങ്ങനെ കൈക്കൂലി വാങ്ങുന്നവരുടെ തലമുറകള് ഗതിപിടിക്കാതെ പോകുമെന്നും കഷ്ടപ്പാടുകളിലൂടെയും പ്രയാസങ്ങളിലൂടെയും ജീവിച്ച തലമുറകള് മാത്രം രക്ഷപ്പെട്ടതാണ് മനുഷ്യന്റെ ചരിത്രമെന്നും സജി ചെറിയാന് പറഞ്ഞു.
'നമ്മുടെ നാട്ടില് ഭൂരിപക്ഷംപേരും ആത്മാര്ത്ഥമായി ജോലി ചെയ്യുന്നവരാണ്. എന്നാല് ചിലര്ക്ക് പണമുണ്ടാക്കാന് നല്ല ആവേശമാണ്. ന്യായമായ ശമ്പളം സര്ക്കാര് ഉദ്യോഗസ്ഥര്ക്ക് നല്കുന്നുണ്ട്. പിന്നെന്തിനാണ് ഈ നക്കാപ്പിച്ച വാങ്ങുന്നത് ? ഇങ്ങനെ വാങ്ങുന്ന പണം ഗുണം ചെയ്യില്ല. മക്കള് അതിന് അനുഭവിക്കേണ്ടിവരും. തലമുറ കണ്ണീര് കുടിക്കും. ഇതുകേട്ട് നേരത്തെ കൈക്കൂലി വാങ്ങിയവര് അത് തിരികെ കൊടുക്കാനൊന്നും പോകേണ്ട. അതിനു പരിഹാരമായി കൂടുതല് ജോലി ചെയ്ത് മറ്റുളളവര്ക്ക് സേവനം ചെയ്താല് മതി'-സജി ചെറിയാന് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
അധ്വാനിച്ചുണ്ടാക്കുന്ന പണം മാത്രമേ ഉപകരിക്കുകയുളളുവെന്നും മടിയില് കനമില്ലാത്തവന് ഒരു വിജിലന്സിനെയും പേടിക്കേണ്ടിവരില്ലെന്നും സജി ചെറിയാന് പറഞ്ഞു. കൈക്കൂലിക്കേസില് അറസ്റ്റിലായ വില്ലേജ് ഫീല്ഡ് അസിസ്റ്റന്റ് വി സുരേഷ് കുമാറിനെയും സജി ചെറിയാന് വിമര്ശിച്ചു. ചിലര് പൈസയ്ക്കുവേണ്ടി മരിക്കുകയാണെന്നും ഇങ്ങനെ കൈക്കൂലി വാങ്ങുന്ന ഒരാളെ താന് കണ്ടിട്ടില്ലെന്നുമാണ് അദ്ദേഹം പറഞ്ഞത്.