കമ്പം: അരിക്കൊമ്പന്റെ ആക്രമണത്തില് പരിക്കേറ്റയാള് മരിച്ചു. കമ്പം സ്വദേശി പാല്രാജ് ആണ് മരിച്ചത്. തേനി മെഡിക്കല് കോളേജില് ചികിത്സയിലിരിക്കെയാണ് മരണം. കമ്പത്തെ തെരുവിലൂടെ ഇറങ്ങി ഓടിയ ആന ബൈക്കില് വരികയായിരുന്ന പാല്രാജിനെ ആക്രമിക്കുകയായിരുന്നു. വാഹനത്തില്നിന്ന് വീണ പാല്രാജിന്റെ തലയ്ക്ക് ഗുരുതരമായി പരിക്കേറ്റിരുന്നു.
അതേസമയം, അരിക്കൊമ്പന് തമിഴ്നാട് വനമേഖലയിലാണ് ഇപ്പോഴുളളത്. കമ്പത്തുനിന്ന് 10 കിലോമീറ്റര് അകലെ ഷണ്മുഖ നദി ഡാമിനു സമീപത്തേക്ക് നീങ്ങുന്നതായുളള സിഗ്നലുകള് വനംവകുപ്പിന് ലഭിച്ചു. ആന ഇനി ജനവാസ മേഖലയിലിറങ്ങിയാല് മാത്രമേ മയക്കുവെടി വയ്ക്കുകയുളളു. ഇടയ്ക്ക് കാടുകയറുകയും ഇറങ്ങുകയും ചെയ്തുളള അരിക്കൊമ്പന്റെ സഞ്ചാരം ദൗത്യത്തിന് തിരിച്ചടിയാകുന്നുണ്ട്. ദൗത്യസംഘാംഗങ്ങളും കുങ്കിയാനകളും കമ്പത്ത് തുടരുകയാണ്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഇടുക്കി ചിന്നക്കനാലില് ജനവാസമേഖലയിലിറങ്ങി ജനങ്ങള്ക്ക് ബുദ്ധിമുട്ടുണ്ടാക്കിയതിനെത്തുടര്ന്നാണ് അരിക്കൊമ്പനെ വനംവകുപ്പ് മയക്കുവെടി വെച്ച് പിടികൂടി പെരിയാര് വന്യജീവി സങ്കേതത്തില് കൊണ്ടുവിട്ടത്. കേരളാ-തമിഴ്നാട് വനാതിര്ത്തികളിലൂടെയാണ് ആന സഞ്ചരിക്കുന്നത്. കമ്പം ടൗണിലിറങ്ങി പരിഭ്രാന്തി സൃഷ്ടിച്ച അരിക്കൊമ്പന് ഇപ്പോള് വനത്തിനുളളിലാണ്.