കോഴിക്കോട്: പെരുമ്പാമ്പ് വിഴുങ്ങിയ കോഴികള്‍ക്ക് നഷ്ടപരിഹാരം തേടി കര്‍ഷകന്‍. വെളളരിക്കുണ്ടില്‍ താലൂക്ക് തല അദാലത്തിനെത്തിയ മന്ത്രി അഹമ്മദ് ദേവര്‍കോവിലിനും ജില്ലാ കളക്ടര്‍ക്കും മുന്നിലാണ് കെ വി ജോര്‍ജ്ജ് എന്ന കര്‍ഷകന്‍ തന്റെ ആവശ്യമുന്നയിച്ചത്. 'പാമ്പ് സര്‍ക്കാരിന്റേതാണെങ്കില്‍ കോഴികള്‍ എന്റേതാണ്. എനിക്ക് നഷ്ടപരിഹാരം കിട്ടണം'-എന്നാണ് കെ വി ജോര്‍ജ്ജ് പറയുന്നത്. ഒരുവര്‍ഷമായി താന്‍ നഷ്ടപരിഹാരത്തിനായി അലയുകയാണെന്നും പലതവണ ശ്രമിച്ചിട്ടും വനംവകുപ്പ് അധികൃതരില്‍നിന്ന് അനുകൂല നടപടിയുണ്ടായില്ലെന്നും കര്‍ഷകന്‍ ആരോപിക്കുന്നു. പരാതി കേട്ട മന്ത്രിയും കളക്ടറും പരിശോധിച്ച് വേണ്ടത് ചെയ്യാമെന്ന് ഉറപ്പുനല്‍കി.
കഴിഞ്ഞ വര്‍ഷം ജൂണിലാണ് കെ വി ജോര്‍ജ്ജിന്റെ കോഴികളെ പെരുമ്പാമ്പ് വിഴുങ്ങിയത്. രാവിലെ കോഴിക്കൂട്ടിനടുത്തെത്തിയ ജോര്‍ജ്ജ് കൂട്ടില്‍ കോഴികള്‍ക്കുപകരം കണ്ടത് പെരുമ്പാമ്പിനെയായിരുന്നു. വിവരമറിഞ്ഞെത്തിയ വനംവകുപ്പ് ഉദ്യോഗസ്ഥര്‍ പാമ്പിനെ എടുത്ത് കൊണ്ടുപോയി വനത്തില്‍ വിട്ടു. കോഴികളെ നഷ്ടമായ ജോര്‍ജ്ജ് ഇതോടെയാണ് നഷ്ടപരിഹാരം ആവശ്യപ്പെട്ട് വനംവകുപ്പിനെ സമീപിച്ചത്. പലതവണ ശ്രമിച്ചിട്ടും നടപടിയുണ്ടാവാഞ്ഞതോടെയാണ് ഇയാള്‍ അദാലത്തില്‍ പരാതിയുമായെത്തിയത്.
