ഡല്ഹി: ജനപ്രിയ സാമൂഹിക മാധ്യമമായ വാട്സ് ആപ്പ് പുതിയ ഫീച്ചര് അവതരിപ്പിച്ചു. പുതിയ അപ്ഡേഷന് അനുസരിച്ച് വീഡിയോ കോളിനിടെ സ്ക്രീന് ഷെയര് ചെയ്യാന് സാധിക്കും. മൈക്രോസോഫ്റ്റ്, ഗൂഗിള് മീറ്റ്, സൂം എന്നീ വീഡിയോ കോണ്ഫ്രന്സിംഗ് ഫ്ലാറ്റ് ഫോമുകളില് ഈ ഫീച്ചര് ലഭ്യമായിരുന്നു. അതെ സൗകര്യം വാട്സ് ആപ്പിലും ലഭ്യമാക്കാനാണ് മെറ്റ ശ്രമിക്കുന്നത്. ഈയൊരു ഫീച്ചര് ഉപയോഗിച്ച് വിഡിയോ കോള് ചെയ്യുന്ന വ്യക്തികള്ക്ക് സ്ക്രീനിൽ ഉള്ളടക്കം പ്രദർശിപ്പിക്കാന് സാധിക്കും. എന്നാല് സ്ക്രീന് ഷെയറിങ്ങില് ഉപയോക്താവിന് പൂര്ണ നിയന്ത്രണം ഉണ്ടായിരിക്കും. സ്വകാര്യത സംരക്ഷിക്കുന്നതിന് എപ്പോള് വേണമെങ്കിലും സ്ക്രീന് ഷെയറിങ് ഉപേക്ഷിക്കാനും ഉപയോക്താവിന് സാധിക്കുന്നവിധമാണ് സേവനം ഒരുക്കിയിരിക്കുന്നത്.
നിലവില് ബീറ്റ ആപ്പ് പതിപ്പ് 2.23.11.19-ലാണ് ഈ ഫീച്ചര് ലഭ്യമാകുന്നത്. ആന്ഡ്രോയ്ഡ് വേര്ഷനുകളില് ഇത് പരീക്ഷിച്ചുക്കൊണ്ടിരിക്കുകയാണ്. ഐ ഒ എസ് ആപ്പ് ഉപയോക്താകള്ക്ക് ഈ ഫീച്ചര് ഉടന് ലഭ്യമാകുമെന്നാണ് റിപ്പോര്ട്ട്. അതേസമയം, വാട്സ് ആപ്പ് അടുത്തിടെ മറ്റൊരു ഫീച്ചര് അവതരിപ്പിച്ചിരുന്നു. പുതിയ അപ്ഡേഷന് അനുസരിച്ച് വാട്സ് ആപ്പിലൂടെ മറ്റൊരാള്ക്ക് അയക്കുന്ന സന്ദേശം തെറ്റിപ്പോയാല് എഡിറ്റ് ചെയ്ത് വീണ്ടും അയക്കാന് സാധിക്കും. അയച്ചുകഴിഞ്ഞ സന്ദേശങ്ങളിൽ തെറ്റുണ്ടായല് ഡിലീറ്റ് ചെയ്ത് വീണ്ടും അയക്കുകയാണ് ഇപ്പോൾ ചെയ്യുന്നത്. എന്നാൽ ഇതിന് പകരം അവ എഡിറ്റ് ചെയ്യാൻ അവസരം ഒരുങ്ങുന്നുവെന്നാണ് വാബെറ്റഇൻഫോ റിപ്പോർട്ട് ചെയ്യുന്നത്. സന്ദേശം അയച്ച് 15 മിനിട്ടിനുള്ളിലാണ് ഈ ഓപ്ഷന് ഉപയോഗിച്ച് എഡിറ്റ് ചെയ്യാന് സാധിക്കുക.