കൊണ്ടോട്ടി: മാലിന്യപ്ലാന്റിനെതിരെ സമരം ചെയ്ത് ജീവിതമവസാനിപ്പിച്ച റസാഖ് പയംബ്രോട്ട് സിപിഎമ്മിന്റെ തീവ്ര വലതുപക്ഷ വ്യതിയാനത്തിന്‍റെ ഇരയാണെന്ന് പ്രതിപക്ഷ നേതാവ് വി ഡി സതീശന്‍. മാലിന്യ സംസ്കരണ പ്ലാന്റിനെതിരായ സമരത്തില്‍ സിപിഎം സ്വീകരിച്ച നിഷേധാത്മകമായ നിലപാടും സമരമുന്നണിയില്‍ നിന്ന അദ്ദേഹത്തെ ഒറ്റപ്പെടുത്താനുള്ള ശ്രമവുമാണ് ആത്മഹത്യയിലേക്ക് നയിച്ചതെന്ന് വി ഡി സതീശന്‍ പറഞ്ഞു. കൊണ്ടോട്ടിയില്‍ റസാഖ് പയംബ്രോട്ടിന്റെ വീട് സന്ദര്‍ശിച്ച ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
''റസാഖ് പയംബ്രോട്ട് തന്‍റെ മരണത്തിന് ഉത്തരവാദികളായ ആളുകളുടെ പേര് ആത്മഹത്യാകുറിപ്പില്‍ എഴുതിവെച്ചിട്ടുണ്ട്. എന്നിട്ടും അന്വേഷണം അട്ടിമറിക്കാനുള്ള ശ്രമമാണ് നടക്കുന്നത്. പഞ്ചായത്ത് പ്രസിഡന്‍റും സിപിഎം ലോക്കല്‍ കമ്മിറ്റി സെക്രട്ടറിയും പ്രതിപട്ടികയില്‍ ഉണ്ട്. അതുകൊണ്ടാണ് അന്വേഷണം ഇഴയുന്നത്. റസാഖ് പയംബ്രോട്ടിന്റെ മരണത്തിന് ഉത്തരവാദികളായവരെ നിയമത്തിന് മുന്നില്‍ കൊണ്ടുവരണം. അന്വേഷണം സുതാര്യമാക്കണം.''- പ്രതിപക്ഷ നേതാവ് ആവശ്യപ്പെട്ടു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ജനനിബിഡമായ പ്രദേശത്ത് മാലിന്യ സംസ്കരണ പ്ലാന്‍റ് പ്രവര്‍ത്തിക്കാന്‍ യുഡിഎഫ് അനുവദിക്കില്ല. പ്ലാന്‍റ് ഉടന്‍ അടച്ചുപൂട്ടണം. ഇത്തരം ഒരു ദുരന്തം കേരളത്തില്‍ ഇനിയാര്‍ക്കും ഉണ്ടാകരുതെന്നും റസാഖിന്‍റെ കുടുംബത്തെ സഹായിക്കാന്‍ സര്‍ക്കാര്‍ തയാറാകണമെന്നും വി ഡി സതീശന്‍ ആവശ്യപ്പെട്ടു. സാംസ്കാരിക പ്രവര്‍ത്തകനും എഴുത്തുകാരനും സിപിഎം സഹയാത്രികനുമായ റസാഖ് പയംബ്രോട്ട് പുളിക്കല്‍ പഞ്ചായത്ത് ഓഫീസിലാണ് ആത്മഹത്യ ചെയ്തത്.
