കോഴിക്കോട് പെരുവയലിൽ എൻഐഎ റെയ്ഡ്. പന്തീരാങ്കാവ് മാവോയിസ്റ്റ് കേസുമായി ബന്ധപെട്ട റെയ്ഡാണെന്നാണ് സൂചന. എൻഐഎ കൊച്ചി യൂണിറ്റിന്റെ നേതൃത്വത്തിലായിരുന്നു റെയ്ഡ്. പെരുവയൽ പെരിങ്ങാട്ടെ വാടക വീട്ടിലാണ് പരിശോധന നടത്തിയത്. വയനാട്, പാലക്കാട് സ്വദേശികൾ ഈ വീട്ടിൽ താമസിച്ചിരുന്നു. ഇവരുടെ നീക്കത്തിൽ സംശയം തോന്നിയതിനെ തുടർന്നാണ് എൻഐഎ പരിശോധന നടത്തിയത്. ഇവർ ഈ മേഖലയിൽ ചില യോഗങ്ങൾ നടത്തിയതായും യുവാക്കളെ സംഘടിപ്പിച്ചതായും എൻഐഎക്ക് വിവരം ലഭിച്ചിരുന്നു. വയനാട്ടിലെ ചില മാവോയിസ്റ്റുകളുമായി താമസക്കാർക്ക് ബന്ധമുണ്ടെന്നാണ് എൻഐഎയുടെ സംശയം.
പന്തീരാങ്കാവ് കേസുമായി ഇവർക്ക് ബന്ധമുണ്ടെന്ന സംശയത്തിലാണ് റെയ്ഡ്. പന്തീരാങ്കാവ് കേസിലെ പ്രതികളെ ചോദ്യം ചെയ്തതിൽ നിന്ന് ലഭിച്ച സൂചന പ്രകാരമാണ് റെയ്ഡ്. റെയ്ഡിൽ ചില പ്രസീദ്ധീകരണങ്ങളും, സിമ്മുകളും കണ്ടെടുത്തായി സൂചനയുണ്ട്. കൊല്ലപ്പെട്ട മാവോയിസ്റ്റ് നേതാവ് സിപി ജലീലിന്റെ മലപ്പുറം പാണ്ടിക്കാട്ടെ വീടിന് സമീപത്തും എൻഐഎ റെയ്ഡ് നടത്തി. രണ്ട് ഇടങ്ങളിലും ഒരേ സമയമാണ് റെയ്ഡ് നടത്തിയത്
