കേന്ദ്രസര്‍ക്കാര്‍ തയ്യാറാക്കിയ റെഡ്‌സോണ്‍ പട്ടിക പശ്ചിമ ബംഗാള്‍ സര്‍ക്കാര്‍ തള്ളി. 4 കോവിഡ് റെഡ്സോണുകൾ മാത്രമേ സംസ്ഥാനത്ത് ഉള്ളൂവെന്നാണു ബംഗാൾ സർക്കാരിന്റെ നിലപാട്. കേന്ദ്രം പുറത്തിറക്കിയ പട്ടികയില്‍ 10 എണ്ണമാണ് ഉള്ളത്. ജില്ലകളെ റെഡ്‌സോണ്‍ ആയി മാറ്റുന്നതിനുള്ള കേന്ദ്രത്തിന്റെ മാനദണ്ഡങ്ങളെ എതിര്‍ത്ത് ബംഗാള്‍ പ്രിന്‍സിപ്പല്‍ സെക്രട്ടറി വിവേക് കുമാര്‍ കേന്ദ്ര ആരോഗ്യ സെക്രട്ടറിക്ക് കത്തെഴുതിയിട്ടുമുണ്ട്. ആകെ 23 ജില്ലകളാണ് പശ്ചിമ ബംഗാളില്‍ ഉള്ളത്.
'സംസ്ഥാനങ്ങളുമായി കാബിനറ്റ് സെക്രട്ടറി നടത്തിയ വീഡിയോ കോണ്‍ഫറന്‍സില്‍ പശ്ചിമബംഗാളിലെ 10 ജില്ലകളെയാണ് ചുവന്ന മേഖലയായി പ്രഖ്യാപിച്ചിരുന്നത്. ഇത് തെറ്റാണ്. റെഡ്സോണുകൾ തരംതിരിക്കുന്ന കേന്ദ്ര സർക്കാരിന്റെ തന്നെ നിലവിലെ മാനദണ്ഡങ്ങളുടെ അടിസ്ഥാനത്തിൽ കൊൽക്കത്ത, ഹൗറ, നോർത്ത് 24 പർഗാനാസ്, പുർബ മെഡിനിപുർ എന്നീ നാലു ജില്ലകൾ മാതമാണ് റെഡ് സോണില്‍ വരുക' എന്ന് ബംഗാളിലെ ആരോഗ്യ സെക്രട്ടറി കേന്ദ്രത്തിന് അയച്ച കത്തിൽ പറയുന്നു.
