മുംബൈ: മഹാരാഷ്ട്രയിലെ ഔറംഗാബാദ്, ഒസ്മാനാബാദ് ജില്ലകളുടെ പേരുകള്‍ ഔദ്യോഗികമായി മാറ്റി. ഇനി മുതല്‍ ഔറംഗാബാദ് ഛത്രപതി സംബാജി നഗര്‍ എന്നും ഒസ്മാനാബാദ് ധാരാശിവ് എന്നുമാണ് അറിയപ്പെടുക. പേരുമാറ്റം അറിയിച്ചുകൊണ്ട് മഹാരാഷ്ട്ര സര്‍ക്കാര്‍ ഔദ്യോഗിക ഉത്തരവ് പുറത്തിറക്കി. നേരത്തെ പേരുമാറ്റം സംബന്ധിച്ച് പൊതുജനാഭിപ്രായം തേടിയിരുന്നെന്നും ഇതില്‍നിന്നുളള നിര്‍ദേശങ്ങളുടെ അടിസ്ഥാനത്തിലാണ് നടപടിയെന്നും റവന്യൂ വകുപ്പ് പുറത്തിറക്കിയ ഉത്തരവില്‍ പറയുന്നു.
ഔറംഗാബാദിന്റെയും ഒസ്മാനാബാദിന്റെയും പേരുകള്‍ മാറ്റാനുളള പ്രാരംഭ നടപടികള്‍ 2022 ജൂണ്‍ 29-ന് അന്നത്തെ മുഖ്യമന്ത്രി ഉദ്ധവ് താക്കറെയുടെ നേതൃത്വത്തില്‍ ചേര്‍ന്ന മഹാവികാസ് അഘാടി സര്‍ക്കാരിന്റെ അവസാന കാബിനറ്റ് യോഗത്തില്‍ ആരംഭിച്ചിരുന്നു. കോണ്‍ഗ്രസിന്റെയും എന്‍സിപിയുടെയും എതിര്‍പ്പ് മറികടന്നാണ് ഉദ്ധവ് താക്കറെ സര്‍ക്കാര്‍ പേരുമാറ്റാനുളള തീരുമാനം കൈക്കൊണ്ടത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
പേരുമാറ്റ തീരുമാനം പ്രഖ്യാപിച്ച് ദിവസങ്ങള്‍ക്കുളളില്‍ ഏക്‌നാഥ് ഷിന്‍ഡെയുടെ നേതൃത്വത്തില്‍ ശിവസേന പിളര്‍ത്തി ഒരുവിഭാഗം ബിജെപിക്കൊപ്പം പോവുകയും ഉദ്ധവ് സര്‍ക്കാര്‍ തകരുകയും ചെയ്തു. ഷിന്‍ഡെ മുഖ്യമന്ത്രിയായി അധികാരത്തിലെത്തിയതോടെ നഗരങ്ങളുടെ പേരുമാറ്റത്തിന് മന്ത്രിസഭ അനുമതി നല്‍കി. ഫെബ്രുവരിയില്‍ ജില്ലകളുടെ പേരുമാറ്റാന്‍ കേന്ദ്രസര്‍ക്കാരും അനുമതി നല്‍കി.
