പ്രധാനമന്ത്രി നരേന്ദ്ര മോദിയുടെ സ്വയം പര്യാപ്ത ഇന്ത്യ അഥവാ 'ആത്മനിർഭർ ഇന്ത്യ' ആശയത്തെ പരിഹസിച്ച് കോൺഗ്രസ് എംപി ശശി തരൂർ രംഗത്ത്. 'മേക്ക് ഇന് ഇന്ത്യ' പദ്ധതിയെ പുതിയ പേരില് വീണ്ടും അവതരിപ്പിക്കുകയാണെന്ന് അദ്ദേഹം ട്വിറ്ററില് കുറിച്ചു. പഴയ സിംഹങ്ങളെ പുതിയ പേരില് വിറ്റു എന്നാണ് അദ്ദേഹം അഭിപ്രായപ്പെട്ടത്. മേക്ക് ഇന് ഇന്ത്യയുടെ ചിഹ്നം സിംഹമായിരുന്നു.
കഴിഞ്ഞ ദിവസം രാജ്യത്തെ അഭിസംബോധന ചെയ്ത് സംസാരിക്കുന്നതിനിടെയാണ് പ്രധാനമന്ത്രി മോദി സ്വയം പര്യാപ്ത ഇന്ത്യ എന്ന ആശയത്തിന് ഊന്നല് നല്കണമെന്ന് ആവശ്യപ്പെട്ടത്. 'ഒരുപാട് സ്വപ്നങ്ങളും വീണ്ടും വില്ക്കുന്നു… മേക്ക് ഇൻ ഇന്ത്യ ഇപ്പോൾ ആത്മ നിർഭർ ഇന്ത്യയായി, പുതിയതായി എന്തെങ്കിലും ഉണ്ടോ?’ എന്നാണ് തരൂര് ചോദിക്കുന്നത്. കൂടാതെ, നരേന്ദ്ര മോദി ഇന്നലെ പ്രഖ്യാപിച്ച 20 ലക്ഷം കോടിയുടെ സാമ്പത്തിക ഉത്തേജക പാക്കേജിനെ രൂക്ഷമായി വിമര്ശിച്ചുകൊണ്ട് കോണ്ഗ്രസ് നേതാവ് പി. ചിദംബരവും നേരത്തെ രംഗത്തെത്തിയിരുന്നു.