കൊറോണ വൈറസ് ബാധയിൽ സർക്കാർ മുന്നറിയിപ്പ് അവഗണിച്ച് രണ്ട് പേർ വിദേശത്തേക്ക് കടന്നു. ചൈനയിൽ നിന്ന് കേരളത്തിൽ എത്തിയ രണ്ട് പേരാണ് സൗദി അറേബ്യയിലേക്ക് പോയത്. കോഴിക്കോട് സ്വദേശികളാണ് രണ്ട് പേരും. ഞായറാഴ്ചയാണ് ഇവർ സൗദിയിലേക്ക് പോയത്. ചൈനയിൽ നിന്ന് എത്തി കോഴിക്കോട് നിരീക്ഷണത്തിലായിരുന്നു ഇവർ. 60 പേരാണ് ജില്ലയിൽ നിരീക്ഷണത്തിൽ ഉണ്ടായിരുന്നത്. ബാക്കി 58 പേരും നിരീക്ഷണത്തിൽ തുടരുകയാണ്.
വിദേശത്തേക്ക് പോയവർക്ക് കൊറോണ വൈറസ് ബാധയുടെ ലക്ഷണങ്ങൾ ഉണ്ടായിരുന്നില്ലെന്ന് ജില്ലാ ആരോഗ്യ വകുപ്പ് അറിയിച്ചു. സംഭവം ഡിഎംഒ ആരോഗ്യവകുപ്പിനെ അറിയിച്ചിട്ടുണ്ട്. വിദേശത്ത് നിന്ന് എത്തിയവർ ആരോഗ്യവകുപ്പുമായി സഹകരിക്കണമെന്ന സർക്കാറിന്റെ നിരന്തര ആവശ്യം തള്ളിയാണ് ഇരുവരും വിദേശത്തേക്ക് പോയത്.