ഡല്ഹി: തൊഴില് നിയമങ്ങള് ലംഘിക്കപ്പെടുന്നതിനെതിരെ സംസ്ഥാനങ്ങള്ക്കും കേന്ദ്ര വകുപ്പുകള്ക്കും മുന്നറിയിപ്പ് നല്കാനും ഈ വിഷയത്തില് രാജ്യാന്തര ജനസമൂഹത്തോടുള്ള പ്രതിബദ്ധത ഉയര്ത്തിപ്പിടിക്കാനും വ്യക്തമായ സന്ദേശം നല്കണമെന്നാണ് ലോക തൊഴില് സംഘടന പ്രധാനമന്ത്രിയോട് ആവശ്യപ്പെട്ടത്. രാജ്യത്ത് തൊഴില് നിയമങ്ങള് അട്ടിമറിക്കപ്പെടുന്നതുമായി ബന്ധപ്പെട്ട് ഇന്ത്യന് ട്രേഡ് യുനിയനുകള് സംയുക്തമായി നല്കിയ പരാതിക്ക് മറുപടിയായാണ് ഇന്റര് നാഷണല് ലേബര് ഓര്ഗനൈസേഷന് ഡയരക്ടര് ഗൈ റൈഡര് ഇക്കാര്യം വെളിപ്പെടുത്തിയത്. സിഐടിയു, ഐഎന്ടിയുസി, എച്ച്എംഎസ് ,എഐടിയുസി തുടങ്ങി 10 ഓളം ട്രേഡ് യുണിയന് സംഘടനകളുടെ സംയുക്ത സമിതിയാണ് ഐഎല്ഒ യെ സമീപിച്ചത്.
രാജ്യത്ത് ഒഡിഷ, ആസാം, ബീഹാര്, അരുണാചല് പ്രദേശ്, രാജസ്ഥാന്, പഞ്ചാബ്, മഹാരാഷ്ട്ര തുടങ്ങിയ സംസ്ഥാനങ്ങള് തൊഴില് സമയം 8 മണിക്കൂറില് നിന്ന് 12 മണിക്കൂറായി വര്ദ്ധിപ്പിച്ചിരുന്നു.മധ്യപ്രദേശ് , ഉത്തര്പ്രദേശ്, ഗുജറാത്ത് തുടങ്ങിയ സംസ്ഥാനങ്ങള് ഏകപക്ഷീയമായി തൊഴില് നിയമങ്ങള് മരവിപ്പിച്ചിരുന്നു. കര്ണാടകയാണ് ദക്ഷിണേന്ത്യയില് ഇത്തരം നിയമങ്ങള് നടപ്പിലാക്കാന് ശ്രമിക്കുന്ന സംസ്ഥാനം. കര്ണാടക തൊഴില് സമയം 10 മണിക്കൂറായി വര്ദ്ധിപ്പിച്ചിട്ടുണ്ട്. കൊവിഡ് വ്യാപനത്തിന്റെയും സാമ്പത്തിക പ്രതിസന്ധിയുടെയും മറവില് തൊഴിലാളികളുടെ അവകാശങ്ങള് കവര്ന്നെടുക്കാനാണ് കോര്പ്പറേറ്റുകളുടെ ഒത്താശയോടെ സര്ക്കാരുകള് ശ്രമിക്കുന്നത് എന്ന് തൊഴിലാളി യുണിയനുകള് ആരോപിച്ചു.