പ്രവാസികൾക്ക് സൗജന്യ ക്വാറന്റൈൻ സൗകര്യം ഒരുക്കാൻ തയ്യാറാണെന്ന് യുഡിഎഫ് ഭരിക്കുന്ന കൊടുവള്ളി നഗരസഭ. ജനകീയ പങ്കാളിത്തത്തോടെയായിരിക്കും സൗകര്യം ഒരുക്കുക. ഇത് സംബന്ധിച്ച് നഗരസഭാ ചെയർമാൻ മുഖ്യമന്ത്രി പിണറായി വിജയന് കത്തയച്ചു. തിരിച്ചെത്തുന്ന പ്രവാസികൾ ക്വാറന്റൈൻ സൗകര്യം സ്വയം വഹിക്കണമെന്ന മുഖ്യമന്ത്രിയുടെ പ്രസ്താവനക്ക് പിന്നാലെയാണ് യുഡിഎഫ് ഭരിക്കുന്ന നഗരസഭയുടെ തീരുമാനം. സന്നദ്ധ സംഘടനകളും പദ്ധതിക്ക് പിന്തുണ അറിയിച്ചിട്ടുണ്ടെന്ന് നഗരസഭ പ്രതിനിധികൾ വ്യക്തമാക്കി. മുഖ്യമന്ത്രിക്ക് നൽകിയ കത്തിൽ മറുപടി ലഭിച്ചാൽ നടപടികളുമായി മുമ്പോട്ട് പോകുമെന്നും നഗരസഭ വ്യക്തമാക്കി.
ക്വാറന്റൈൻ ചെലവ് പ്രവാസികൾ സ്വയം വഹിക്കണമെന്ന സർക്കാർ നിലപാടിനെതിരെ യുഡിഎഫ് രംഗത്തുവന്നിരുന്നു. ക്വാറന്റൈൻ ചെലവ് യുഡിഎഫ് ഏറ്റെടുക്കമെന്ന് പികെ കുഞ്ഞാലിക്കുട്ടി എംപി വ്യക്തമാക്കിയിരുന്നു. സ്പോൺസർഷിപ്പിലൂടെയാകും ഇതിനുള്ള പണം കണ്ടെത്തുകയെന്നും കുഞ്ഞാലിക്കുട്ടി വ്യക്തമാക്കി.