ആഡംബര കാർ വിപണിയിലെ വമ്പൻമാരായ മെഴ്സിഡീസ് ബെൻസ് 2 സൂപ്പർ പെർഫോമൻസ് മോഡലുകൾ ഇന്ത്യൻ വിപണിയിലെത്തിച്ചു. സി- ക്ലാസിലെ ടോപ്പ് വേരിയന്റായ ഈ കൂപ്പെ മോഡലിന് 1.33 കോടി രൂപയാണ് ഇന്ത്യയിലെ എക്സ്ഷോറൂം വില. ഈ വാഹനത്തിനൊപ്പം തന്നെ എഎംജിയുടെ ജിടിആര് പതിപ്പും മെഴ്സിഡീസ് അവതരിപ്പിച്ചിട്ടുണ്ട്.
എഎംജി സി63-യിൽ ഉള്ളത് 476 എച്ച്പി കരുത്തും 650 എൻഎം കുതിപ്പുശേഷിയുമുള്ള 4 ലീറ്റർ ഇരട്ട ടർബോ വി8 എഞ്ചിനാണ് ഉള്ളത്. എഎംജി ജിടിയില് നിന്ന് കടമെടുത്ത പാനമേരിക്കാന ഗ്രില്ല്, ബഗ്-ഐ ഹെഡ്ലാമ്പ്, എല്ഇഡി ഡിആര്എല്, മസ്കുലര് ബോണറ്റ്, പുതിയ ബംമ്പര്, 18 ഇഞ്ച് അലോയി വീല്, ഡിഫ്യൂസര് തുടങ്ങിയവ ഈ വാഹനത്തിന് സ്പോട്ടി ഭാവമൊരുക്കും. പൂജ്യത്തിൽനിന്നു 100 കിലോമീറ്റർ വേഗമാർജിക്കാൻ വേണ്ടത് വെറും 4 സെക്കൻഡ്.
മണിക്കൂറിൽ 250 കിലോമീറ്റർ വരെ വേഗമെടുക്കാം. എഎംജി ജിടി ആറിന്റെ പരിഷ്കരിച്ച പതിപ്പാണ് ഇതോടൊപ്പമെത്തിയിരിക്കുന്നത്. പരമാവധി 318 കിമീ വരെ വേഗത്തിൽ പായാം. 2.48 കോടി രൂപയാണു വില. ഡീലർമാർ വഴിയും ഓൺലൈൻ ആയും കാർ വാങ്ങാം.