ഡല്ഹി: രാജ്യത്തെ ലോക്ക് ഡൌണ് അഞ്ചാം ഘട്ടം ജൂണ് 30 വരെ നീട്ടാന് കേന്ദ്ര സര്ക്കാര് തീരുമാനിച്ചു. കണ്ടെയ്ന്മെന്റ് സൊണുകളില് മാത്രമായിരിക്കും കര്ശന നിയന്ത്രണം ഉണ്ടാവുക. ബാക്കിയിടങ്ങളില് ഘട്ടം ഘട്ടമായി ലോക്ക് ഡൌണ് നിയന്ത്രണങ്ങളില് ഇളവുകള് നല്കും. എല്ലാ സ്ഥലങ്ങളിലും രാത്രി 9 മണി മുതല് പുലര്ച്ചെ 5 മണി വരെയുള്ള യാത്രാ കര്ഫ്യു കര്ശനമായും തുടരും.
മൂന്നു ഘട്ടങ്ങളായാണ് ലോക്ക് ഡൌണ് ഇളവുകള് പ്രാബല്യത്തില് വരിക. ജൂണ് 8 ന് ആദ്യഘട്ടം അവസാനിക്കുമ്പോള് ആരാധനാലയങ്ങള്, ഹോട്ടലുകള്, ഷോപ്പിംങ്ങ് മാളുകള് എന്നിവയ്ക്ക് പ്രവര്ത്തനാനുമതി നല്കും. ഇത് സംബന്ധിച്ച മാര്ഗ്ഗ നിര്ദ്ദേശങ്ങള് സര്ക്കാര് ആ സമയത്ത് പുറപ്പെടുവിക്കും.
വിദ്യാഭ്യാസ സ്ഥാപനങ്ങള് തുറക്കാനുള്ള അനുമതിയുമായി ബന്ധപ്പെട്ട ആലോചന രണ്ടാം ഘട്ടത്തിലാണ് നടക്കുക. സാഹചര്യങ്ങള് വിലയിരുത്തി, രാജ്യത്തെ സംസ്ഥാന സര്ക്കാരുകളുമായാലോചിച്ച് അടുത്തമാസം ആദ്യത്തോടെ ഇക്കാര്യത്തില് തീരുമാനമെടുക്കും. രാജ്യാന്തര യാത്രാ വിലക്കും, മദ്യശാലകള്, ബാറുകള്,തിയേറ്ററുകള്, മറ്റ് വിവിധ തരം പരിശീലന കൂട്ടായ്മകള്, വിനോദ സഞ്ചാര മേഖല, പൊതു ഒത്തുചേരലുകള് എന്നിവയ്ക്കുള്ള നിയന്ത്രണവും വിലക്കും മൂന്നാം ഘട്ടത്തില് പിന്വലിക്കാനാണ് തീരുമാനം. എല്ലാ ഘട്ടങ്ങളും സംസ്ഥാന സര്ക്കാരുകളുമായി ആലോചിച്ചതിനു ശേഷമായിരിക്കും നടപ്പിലാക്കുക. എന്നാല് ആദ്യ ഘട്ട ലോക്ക് ഡൌണ് കാലയളവ് പോലെ കര്ശന നിയന്ത്രണങ്ങള് തുടരും.