കോട്ടയം വേളൂരിൽ യുവതിയെ തലക്കടിച്ച് കൊലപ്പെടുത്തിയ സംഭവത്തിൽ മോഷണം മാത്രമല്ല പ്രതികളുടെ ലക്ഷ്യമെന്ന് പൊലീസ്. കൊലപാതകവുമായി ബന്ധപ്പെട്ട് മുഴുവൻ വശങ്ങളും പരിശോധിക്കുമെന്ന് കോട്ടയം എസ്പി മാധ്യമങ്ങളോട് പറഞ്ഞു. അന്വേഷണം പ്രാഥമിക ഘട്ടത്തിലായതിനാൽ കൂടുതൽ വിവരങ്ങൾ പുറത്തുവിടാനാവില്ലെന്നും പൊലീസ് എസ്പി വ്യക്തമാക്കി. കൊലപാതകം നടന്ന വീട്ടിൽ നിന്ന മോഷണം പോയ കാർ ഇതുവരെ കണ്ടെത്താനായിട്ടില്ല.
കൃത്യത്തിൽ കൂടുതൽ പ്രതികൾ ഉൾപ്പെട്ടിട്ടുണ്ടോ എന്നും പരിശോധിക്കുന്നുണ്ട്. കൊല്ലപ്പെട്ടവരുടെ സാമ്പത്തിക ഇടപാടുകൾ പൊലീസ് പരിശോധിക്കുന്നുണ്ട്. അടുത്ത ബന്ധുക്കളെയും സുഹൃത്തുക്കളെയും കേന്ദ്രീകരിച്ചു അന്വേഷണം നടക്കുന്നുണ്ട്. കഴിഞ്ഞ ഒരു മാസത്തിനുള്ളിലെ മൊബൈൽ വിളികൾ പൊലീസ് പരിശോധിക്കും. കൃത്യത്തിന് പിന്നിൽ കുടുംബത്തെ നേരിട്ട് അറിയുന്നവരാകാമെന്ന നിഗമനത്തിലാണ് പൊലീസ്. വിവിധ സംഘങ്ങളായാണ് പൊലീസ് അന്വേഷണം പുരോഗമിക്കുന്നത്
