തിരുവനന്തപുരം: സംസ്ഥാനത്ത് ഇന്നും തുടര്‍ ദിവസങ്ങളിലും കനത്ത മഴയുണ്ടാകുമെന്ന് കാലാവസ്ഥാ നിരീക്ഷണകേന്ദ്രം അറിയിച്ചു. മണിക്കൂറില്‍ അമ്പത് കിലോമീറ്റര്‍ വരെ വേഗതയില്‍ കാറ്റടിക്കാനും സാദ്ധ്യതയുണ്ട്. തീരപ്രദേശങ്ങളിലുള്ളവര്‍ ജാഗ്രത പാലിക്കണം. കടല്‍ പ്രക്ഷുബ്ദമാകാന്‍ സാദ്ധ്യതയുള്ളതിനാല്‍ മത്സ്യ ബന്ധനത്തിന് പോകരുതെന്ന് തൊഴിലാളികള്‍ക്ക് കാലാവസ്ഥാ നിരീക്ഷണകേന്ദ്രം മുന്നറിയിപ്പ് നല്‍കി.
ഇത്തവണ സമയത്തെത്തിയ മണ്‍സൂണ്‍ കാലവര്‍ഷത്തില്‍ രേഖപ്പെടുത്തിയ മഴയുടെ ലഭ്യത കൂടുതലാണ്. ഇത്രയും ദിവസത്തിനകം ലഭിക്കേണ്ട മഴയുടെ തോത് 9 സെന്റി മീറ്ററാണ്. എന്നാല്‍ ഈ ദിവസങ്ങള്‍ക്കകം സംസ്ഥാനത്ത് ഇതുവരെ 14 സെന്റി മീറ്റര്‍ മഴ ലഭിച്ചു കഴിഞ്ഞു. മദ്ധ്യ കേരളത്തിലും തെക്കന്‍ ജില്ലകളിലുമാണ് കൂടുതല്‍ അളവില്‍ മഴ ലഭിച്ചത്. അതായത് സംസ്ഥനത്ത് 60 ശതമാനം കൂടുതല്‍ മഴ ലഭിച്ചതായാണ് കണക്കുകള്‍ സൂചിപ്പിക്കുന്നത്.
തുടര്‍ ദിവസങ്ങളിലും ശക്തമായ മഴ പ്രവചിച്ചതിനാല്‍ എറണാകുളം, ആലപ്പുഴ, കോട്ടയം, പത്തനംതിട്ട, കൊല്ലം, തിരുവനന്തപുരം തുടങ്ങിയ ജില്ലകളില്‍ യെല്ലോ അലര്‍ട്ട് പ്രഖ്യാപിച്ചിട്ടുണ്ട്.
