ജറുസലേം: വെസ്റ്റ് ബാങ്കിന്റെ ഭാഗങ്ങള്‍ ഇസ്രായേലിനോട് കൂട്ടിച്ചേര്‍ക്കാനുള്ള തീരുമാനത്തില്‍ ആശങ്ക പ്രകടിപ്പിച്ച് ജോര്‍ദാന്‍ താഴ്വരയിലെ പലസ്തീനിയന്‍ കര്‍ഷകര്‍. ബുധനാഴ്ച തന്നെ തുടങ്ങിയേക്കാവുന്ന കൂട്ടിച്ചേര്‍ക്കലിനുശേഷം തങ്ങളുടെ ഭാവി എന്താകുമെന്ന ഭയത്തിലാണ് ജനങ്ങള്‍.
കൂട്ടിച്ചേര്‍ക്കലിനു ശേഷം സ്വന്തം ഭൂമിയിലെയും വെസ്റ്റ് ബാങ്കിന്റെ ബാകി ഭാഗങ്ങളില്നിന്നുമുള്ള അധികാരം നഷ്ടപ്പെടുന്നതോടെ ഇവരുടെ ഏക വരുമാനമാര്‍ഗമായ കയറ്റുമതി വ്യാപാരവും തകര്‍ച്ചയിലേക്ക് നീങ്ങും. പലസ്തീനിന്റെ ബ്രെഡ്‌ ബാസ്കറ്റ് എന്നറിയപ്പെടുന്ന ജോര്‍ദാന്‍ താഴ്വര നഷ്ടപ്പെടുന്നതിലൂടെ കര്‍ഷകരുടെ ജീവിതം ദുരിതതിലാവുമെന്നത് ഉറപ്പാണ്. “കൂട്ടിചേര്‍ക്കലിനോട് ഞങ്ങള്‍ക്ക് ഭയമാണ്, ഇതിനപ്പുറം ഞങ്ങളുടെ ഭാവിയെന്താവുമെന്നുള്ള ആവലാതിയിലാണ് ഞങ്ങള്‍ “ 52കാരനായ മുനീര്‍ നസസ്രി അല്‍ ജസീറയോടു പറഞ്ഞു.
പലസ്തീന്‍- ഇസ്രയേല്‍ പ്രശ്നത്തിന് പരിഹാര നിര്‍ദേശങ്ങളുമായി യു.എസ് പ്രസിഡണ്ട്‌ ഡോണള്‍ട് ട്രംപ് മുന്നോട്ടുവെച്ച മിഡില്‍ ഈസ്റ്റ്‌ സമാധാന പദ്ധതിയിലാണ് പലസ്തീനിനെ സ്വാതന്ത്ര്യ രാജ്യമായി പ്രഖ്യാപിക്കുവാനും ഇസ്രായേലിന്‍റെ തലസ്ഥാനമായി ജറുസലേമിനെ നിലനിര്‍ത്തുവാനുമുള്ള തീരുമാനം. പലസ്തീന്‍ ഇക്കാര്യത്തില്‍ വിയോജിപ്പ്‌ അറിയിച്ചിരുന്നു. ഈ പദ്ധതിയുടെ ഭാഗമായി യു എസ് പിന്തുണയോടെ വെസ്റ്റ് ബാങ്കിന്റെ ഭാഗങ്ങള്‍ ഇസ്രായേലിനോട് കൂട്ടിചെര്‍ക്കുവാനുള്ള പ്രധാനമന്ത്രി ബെഞ്ചമിന്‍ നേതന്യാഹുവിന്റെ തീരുമാനമാണ് കര്‍ഷകരേ ആശങ്കയിലാക്കുന്നത്. എന്നാല്‍ ഇന്നുമുതല്‍ നടത്താനിരുന്ന കൂട്ടിച്ചേര്‍ക്കലിനോട് യു എസ് ഇതുവരെ ഔദ്യോഗികമായി അഭിപ്രായം അറിയിച്ചിട്ടില്ല.
ഇന്നല്ലെങ്കില്‍ നാളെ ഇത്തരത്തിലൊരു തീരുമാനം പ്രതീക്ഷിച്ചിരുന്നുവെന്നും കാലങ്ങളായി കര്‍ഷകര്‍ക്കെതിരെ ഒഴിപ്പിക്കല്‍ നടപടികള്‍ സ്വീകരിച്ചിരുന്നുവെന്നും പലസ്തീനിയന്‍ കര്‍ഷകര്‍ തുറന്നുപറഞ്ഞു.
