ബിജെപിയില്‍ ചേരുമെന്ന വാര്‍ത്തകള്‍ നിഷേധിച്ച് സച്ചിന്‍ പൈലറ്റ്. തനിക്കെതിരെ ചില കോണ്‍ഗ്രസ് നേതാക്കള്‍ കള്ള പ്രചാരണം നടത്തുകയാണ്. രാജസ്ഥാനില്‍ ബിജെപിക്കെതിരെ പോരാടി അവരെ പരാജയപ്പെടുത്തിയ ആളാണ് താനെന്നും സച്ചിന്‍ വ്യക്തമാക്കി.
മുഖ്യമന്ത്രി അശോക് ഗെഹ്ലോട്ടിന്റെ അധ്യക്ഷതയില്‍ കൂടിയ പാര്‍ട്ടി നിയമസഭാ കക്ഷി യോഗത്തില്‍ പങ്കെടുക്കാത്തതിനെത്തുടര്‍ന്ന് ഇന്നലെയാണ് സച്ചിന്‍ പൈലറ്റിനെ രാജസ്ഥാന്‍ ഉപമുഖ്യമന്ത്രി സ്ഥാനത്തു നിന്നും പിസിസി പ്രസിഡന്റ് സ്ഥാനത്തുനിന്നും നീക്കിയത്. സച്ചിനൊപ്പം നില്‍ക്കുന്ന മന്ത്രിമാരായ വിശ്വേന്ദ്ര സിങ്, രമേശ് മീണ എന്നിവരെയും കാബിനറ്റില്‍നിന്നും ഒഴിവാക്കി.
അതേസമയം, 19 റിബല്‍ എംഎല്‍എമാരെ അയോഗ്യരാക്കണമെന്ന കോണ്‍ഗ്രസിന്റെ ആവശ്യത്തെത്തുടര്‍ന്ന് രാജസ്ഥാന്‍ സ്പീക്കര്‍ സി.പി.ജോഷി എംഎല്‍എമാര്‍ക്ക് നോട്ടീസ് നല്‍കി. വെളളിയാഴ്ച എംഎല്‍എമാര്‍ മറുപടി നല്‍കണമെന്നാണ് നോട്ടീസില്‍ ആവശ്യപ്പെട്ടിട്ടുളളത്.
