വാഗണ്‍ ആര്‍ 1.0, ബലേനോ എന്നീ കാറുകളെ മാരുതി സുസുക്കി തിരിച്ചു വിളിക്കുന്നു. വാഗണ്‍ ആര്‍1.0 അരീന ഡീലര്‍ഷിപ്പുകളിലൂടെയും, ബലേനോ പ്രീമിയം നെക്‌സ ഷോറും വഴിയും റീട്ടെയില്‍ ചെയ്യ്ത കാറുകളായിരുന്നു.
2018 നവംബര്‍ 15 മുതല്‍ 2019 ഒക്ടോബര്‍ 15 വരെ നിര്‍മ്മിച്ച വാഗണ്‍ആറിന്റെ 56,663 യൂണിറ്റുകളും 2019 ജനുവരി 8 മുതല്‍ 2019 നവംബര്‍ 4 നും ഇടയില്‍ നിര്‍മ്മിച്ച ബലേനോയുടെ 78,222 യൂണിറ്റുകള്‍ ഉള്‍പ്പെടെ 134,885 യൂണിറ്റുകളാണ് കമ്പനി തിരിച്ചുവിളിച്ചത്. രണ്ട് മോഡലുകളിലും ഇന്ധന പമ്പില്‍ പ്രശ്‌നങ്ങളുണ്ടെന്ന് സംശയിക്കുന്നതിനാലാണ് മാരുതി സുസുക്കിയുടെ തീരുമാനം.
കേടുവന്ന ഭാഗങ്ങള്‍ പൂര്‍ണ്ണമായും സൗജന്യമായി മാറ്റിസ്ഥാപിക്കുമെന്നും അതിനായി ഉപയോക്താക്കളില്‍ നിന്നും യാതൊരു തുകയും ഈടാക്കില്ലെന്നും മാരുതി സുസുക്കി ഉറപ്പു നല്‍കി. തിരിച്ചു വിളിച്ചിരിക്കുന്ന വാഹനങ്ങളുടെ ഉടമകള്‍ മാരുതി സുസുക്കി അംഗീകൃത ഡീലര്‍മാരുമായി ബന്ധപ്പെടണമെന്ന് കമ്പനി അറിയിച്ചു.
