ജയ്പൂര്‍: പൌരത്വ നിയമ ഭേദഗതി പ്രകാരം ആദ്യം തടങ്കലിലേക്ക് പോകേണ്ടി വരിക താനായിരിക്കുമെന്നു രാജസ്ഥാന്‍ മുഖ്യമന്ത്രി അശോക്‌ ഗഹലോട്ട് ജയ്പൂരില്‍ പറഞ്ഞു. ''എന്‍റെ മാതാപിതാക്കള്‍ എവിടുന്നു വന്നവരാണ് എന്ന് എനിക്കറിയില്ല; അവരുടെ ജന്മസ്ഥലം എതെന്നും അറിയില്ല'' അശോക്‌ ഗഹലോട്ട് പറഞ്ഞു. പൌരത്വ നിയമ ഭേദഗതിക്കെതിരായി നടന്ന പ്രതിഷേധ റാലിയില്‍ സംസാരിക്കുകയായിരുന്നു രാജസ്ഥാന്‍ മുഖ്യമന്ത്രി.
പൌരത്വ നിയമ ഭേദഗതി ഇന്ത്യയുടെ ആത്മാവിനു വിരുദ്ധമാണ്. ഷാഹിന്‍ ബാഗ് ഒരു ഒറ്റപ്പെട്ട പ്രതിഷേധമല്ല, രാജസ്ഥാനിലെ തെരുവുകളില്‍ പ്രതിഷേധം നടക്കുകയാണ്.ഇന്ത്യയിലാകെ പ്രതിഷേധം വ്യാപിക്കുകയാണ്. ജനങ്ങളുടെ ഈ വികാരം കാണാന്‍ കേന്ദ്ര സര്‍ക്കാരിന് കഴിയണമെന്നും അശോക്‌ ഗഹലോട്ട് പറഞ്ഞു.
രാജ്യത്ത് ശാന്തിയും ഐക്യവും ഊട്ടിയുറപ്പിക്കുക എന്നത് തന്നെയാണ് പ്രധാനം. ഇതിനായി നിയമ ഭേദഗതി പിന്‍വലിക്കാന്‍ മോദി സര്‍ക്കാര്‍ തയാറാകണം. നിയമങ്ങള്‍ നിര്‍മിക്കാന്‍ സര്‍ക്കാരുകള്‍ക്ക് അവകാശമുണ്ട്‌.എന്നാല്‍ ജനഹിതം അതിന് അനുകൂലമല്ലെങ്കില്‍ പിന്‍വലിക്കാനും തയാറാകണമെന്ന് അശോക്‌ ഗഹലോട്ട് ഓര്‍മിപ്പിച്ചു.
