ഹനുമാൻ ചാലിസ പാരായണം ചെയ്താൽ കൊറോണ ലോകത്തുനിന്ന് പോകുമെന്ന് ബിജെപി എംപി പ്രഗ്യ സിംഗ് താക്കൂർ. ഓഗസ്റ്റ് 5 വരെ ഹനുമാൻ ചാലിസ ദിവസത്തിൽ അഞ്ച് തവണ പാരായണം ചെയ്യണമെന്നാണ് അവര് ജനങ്ങളോട് അഭ്യർത്ഥിക്കുന്നത്.
"ജനങ്ങൾക്ക് നല്ല ആരോഗ്യം ലഭിക്കുവാനും കൊറോണ വൈറസ് പകർച്ചവ്യാധി അവസാനിപ്പിക്കുന്നതിനും നമുക്കെല്ലാവർക്കും ഒരുമിച്ച് ഒരു ആത്മീയ ശ്രമം നടത്താം. ഹനുമാൻ ചാലിസ ജൂലൈ 25 മുതൽ ഓഗസ്റ്റ് 5 വരെ നിങ്ങളുടെ വീട്ടിൽ ഒരു ദിവസം അഞ്ച് തവണ ചൊല്ലുക,” ഭോപ്പാൽ എംപി ട്വീറ്റ് ചെയ്തു. ഓഗസ്റ്റ് 5 ന് വിളക്കുകൾ തെളിയിച്ച് ശ്രീരാമദേവന് വീട്ടിൽ ‘ആരതി’ അർപ്പിച്ച് ഈ ചടങ്ങ് അവസാനിപ്പിക്കണമെന്നും അവർ കൂട്ടിച്ചേർത്തു. അയോദ്ധ്യയിൽ രാമക്ഷേത്രം പണിയുന്നതിനുള്ള 'ഭൂമി പൂജ' ഓഗസ്റ്റ് 5 നാണ് നടക്കുന്നത്.
"രാജ്യമെമ്പാടുമുള്ള ഹിന്ദുക്കൾ ഒരേ ശബ്ദത്തിൽ ‘ഹനുമാൻ ചാലിസ’ ചൊല്ലുമ്പോൾ, അത് തീർച്ചയായും പ്രവർത്തിക്കും, നമ്മൾ കൊറോണ വൈറസിൽ നിന്ന് മുക്തരാകും. ഇത് ശ്രീരാമനോടുള്ള നമ്മുടെ പ്രാർത്ഥനയാണ്,” താക്കൂർ പറഞ്ഞു. ഓഗസ്റ്റ് 4 വരെ ഭോപ്പാലിൽ ലോക്ക്ഡൗൺ ഏർപ്പെടുത്തിക്കൊണ്ട് മധ്യപ്രദേശിലെ ബിജെപി സർക്കാർ കൊറോണ വൈറസ് വ്യാപനം തടയുന്നതിനായുള്ള ശ്രമങ്ങൾ നടത്തിവരുന്നതിന്റെ വിഡിയോയും അവർ ട്വിറ്ററിൽ പങ്കുവെച്ചു.