കെട്ടിടത്തിന്റെ നാലാം നിലയിൽ നിന്ന് വീണ് മെറ്റൽ ഗ്രില്ലിൽ കുടുങ്ങിപ്പോയ ആൾക്ക് ഡെൽഹി പോലീസ് രക്ഷകരായി. നാല്പതുകാരനായ കിഷൻകുമാറിനെയാണ് പോലീസുകാർ രക്ഷപെടുത്തി ആശുപത്രിയിൽ എത്തിച്ചത്. തെക്കൻ ദില്ലിയിലെ മാൽവിയ നഗറിൽ ബുധനാഴ്ചയാണ് സംഭവം നടന്നത്.
മഴ പെയ്യുന്നതിനിടെ എന്തോ പരിശോധിക്കാനായി കുമാർ മുകളിലേക്ക് പോയിതായിരുന്നുവെന്നും പടികൾ കയറുന്നതിനിടയിൽ ഗോവണിയിലെ റെയിലിംഗ് തകർന്ന് ഇയാൾ മറ്റൊരു കെട്ടിടത്തിന്റെ ഇരുമ്പ് ഗ്രില്ലിൽ വീഴുകയാണ് ചെയ്തതെന്നും ഡെപ്യൂട്ടി പോലീസ് കമ്മിഷണർ അതുൽ കുമാർ താക്കൂർ പറഞ്ഞു. സംഭവസ്ഥലത്തെത്തിയ സബ് ഇൻസ്പെക്ടർ കൃഷൻ സൈനിയും കോൺസ്റ്റബിൾ ഷിഷ്രാമും ഗ്രില്ലിന്റെ പല്ലുകൾ വലതു കാലിൽ തുളച്ചുകയറി തലകീഴായി തൂങ്ങിക്കിടക്കുന്ന കുമാറിനെയാണ് കണ്ടത്. ഇരുമ്പ് കട്ടറിന്റെ സഹായത്തോടെ ഗ്രിൽ മുറിച്ച് ആളെ രക്ഷപ്പെടുത്തി, ഉടൻ തന്നെ ആശുപത്രിയിൽ എത്തിക്കുകയാണ് ചെയ്തതെന്ന് താക്കൂർ മാധ്യമങ്ങളെ അറിയിച്ചു.