അയോധ്യയിൽ രാമക്ഷേത്ര ശിലാസ്ഥാപനത്തില് പങ്കെടുത്ത രാമജന്മഭൂമി ട്രസ്റ്റിന്റെ തലവനായ മഹാന്ത് നൃത്ത്യാ ഗോപാൽ ദാസിന് കൊവിഡ് സ്ഥിരീകരിച്ചു. പ്രധാനമന്ത്രി നരേന്ദ്ര മോഡിക്കൊപ്പം വേദി പങ്കിട്ടവരില് ഒരാളാണ് അദ്ദേഹം. വിഷയത്തിൽ യുപി മുഖ്യമന്ത്രി യോഗി ആദിത്യനാഥ് കൂടുതൽ വിവരങ്ങൾ തേടി.
ഉത്തർപ്രദേശ് മുഖ്യമന്ത്രി യോഗി ആദിത്യനാഥ്, ഗവർണർ ആനന്ദിബെൻ പട്ടേൽ, ആർ.എസ്.എസ് മേധാവി മോഹൻ ഭാഗവത് എന്നിവരാണ് വേദിയിലുണ്ടായിരുന്ന മറ്റുള്ളവര്. ചടങ്ങിന് ദിവസങ്ങൾക്ക് മുമ്പ്, പുരോഹിതൻ പ്രദീപ് ദാസ്, രാം ജന്മഭൂമി സമുച്ചയത്തിലെ ഡ്യൂട്ടിയിലുണ്ടായിരുന്ന 14 പോലീസുകാർ എന്നിവര്ക്കും കൊവിഡ് സ്ഥിരീകരിച്ചിരുന്നു.
35 സന്യാസിമാരും പൗരപ്രമുഖരും രാഷ്ട്രീയ നേതാക്കളുമടങ്ങുന്ന ക്ഷണിതാക്കളുടെ സാന്നിധ്യത്തിലായിരുന്നു ശിലാസ്ഥാപന ചടങ്ങുകള് നടന്നത്. ആകെ 175 പേര് മാത്രമാണ് ചടങ്ങുകളില് പങ്കെടുത്തിരുന്നത്.