ഇന്ത്യയിൽ തുടർച്ചയായ മൂന്നാം ദിവസവും ആയിരത്തോളം കൊവിഡ് മരണങ്ങൾ. ഇതോടെ രാജ്യത്ത് ഇതുവരെ കൊറോണ വൈറസ് രോഗം മൂലം മരണമടഞ്ഞ രോഗികളുടെ എണ്ണം 61,690 ആയി. മാർച്ച് 12 നാണ് ഇന്ത്യയിൽ ആദ്യത്തെ മരണം റിപ്പോർട്ട് ചെയ്തത്.
രാജ്യത്ത് ഇന്നലെ ഏറ്റവും കൂടുതൽ കൊവിഡ് -19 കേസുകൾ റിപ്പോർട്ട് ചെയ്യപ്പെട്ടു. 76,870 സാമ്പിളുകളാണ് പോസിറ്റീവ് ആണെന്ന് കണ്ടെത്തിയത്. 75,000 പുതിയ കേസുകളാണ് ഇന്നലെ റിപ്പോർട്ട് ചെയ്തത്. രാജ്യത്ത് ഏറ്റവുമധികം കോവിഡ് -19 മരണങ്ങൾ റിപ്പോർട്ട് ചെയ്തത് മഹാരാഷ്ട്രയിലാണ്. ഇന്നലെ, 355 പേരാണ് മരിച്ചത്. ഇതോടെ, സംസ്ഥാനത്തെ ആകെ കൊവിഡ് മരണസംഖ്യ 23,444 ആയി. മരണസംഖ്യ ഏറ്റവും കൂടുതലായ മറ്റൊരു സംസ്ഥാനം തമിഴ്നാടാണ്. 6,948 മരണങ്ങളാണ് ഇതുവരെ ഇവിടെ റിപ്പോർട്ട് ചെയ്തത്.
കോവിഡ് -19 കേസുകളുടെയും മരണങ്ങളുടെയും എണ്ണം കുറയാത്തതിനാൽ, ഉയർന്ന മരണനിരക്ക് റിപ്പോർട്ട് ചെയ്യുന്ന ജില്ലകളിൽ ശ്രദ്ധ കേന്ദ്രീകരിക്കണമെന്ന് കേന്ദ്ര ആരോഗ്യ സെക്രട്ടറി രാജേഷ് ഭൂഷൺ വ്യാഴാഴ്ച സംസ്ഥാനങ്ങൾക്ക് നിർദ്ദേശം നൽകി.