ഡല്ഹി: മുന്രാഷ്ട്രപതി പ്രണബ് കുമാര് മുഖര്ജിയുടെ സംസ്കാരം പൂര്ണ സൈനിക ബഹുമതികളോടെ ഡല്ഹി ലോദി റോഡിലെ ശ്മശാനത്തില് നടന്നു. ഉച്ചയ്ക്ക് രണ്ടുമണിയോടെ നടന്ന സംസ്കാര ചടങ്ങ് കൊവിഡ് പ്രൊടോകോള് കര്ശനമായി പാലിച്ചു കൊണ്ടാണ് നടന്നത്.
രാവിലെ രാജാജി മാര്ഗിലെ 10-ാം നമ്പര് വസതിയില് എത്തിച്ച മൃതദേഹത്തില് രാഷ്ട്രപതി രാം നാഥ് കോവിന്ദ്, പ്രധാനമന്ത്രി നരേന്ദ്ര മോദി എന്നിവര് അന്ത്യോപചാരമര്പ്പിച്ചു. കൊവിഡ് പ്രോടോകോള് നിലനില്ക്കുന്നതിനാല് ആംബുലന്സ് വാനിലാണ് മൃതദേഹം ശ്മശാനത്തിലേക്ക് കൊണ്ടുവന്നത്. കേന്ദ്ര ആരോഗ്യ മന്ത്രാലയത്തിന്റെ കൊവിഡ് മാര്ഗ്ഗ നിര്ദ്ദേശങ്ങള് കര്ശനമായി പാലിച്ചാണ് സംസ്കാരം നടന്നത് എന്ന് പ്രതിരോധ മന്ത്രാലയം വ്യക്തമാക്കി.
തലയ്ക്ക് നടത്തിയ ശസ്ത്രക്രിയയെ തുടര്ന്ന് ഡല്ഹി സൈനിക ആശുപത്രിയില് ചികിത്സയിലായിരുന്ന മുന് രാഷ്ട്രപതി ഇന്നലെ വൈകീട്ട് അഞ്ചു മണിയോടെയാണ് മരണപ്പെട്ടത്. മുന് രാഷ്ട്രപതിയുടെ നിര്യാണത്തെ തുടര്ന്ന് രാജ്യം ഒരാഴ്ചത്തെ ദുഖാചരണം പ്രഖ്യാപിച്ചിട്ടുണ്ട്.