തിരുവനന്തപുരം: ഇരുട്ടിന്‍റെ മറവില്‍ ഇനിയൊന്നും നടക്കില്ല. സംസ്ഥാനത്ത് ഇനി നഗരങ്ങള്‍ക്ക് ഉറക്കമുണ്ടാവില്ല. നഗരങ്ങളിലെ വെളിച്ചം അണയാതെ, ആള്‍ പെരുമാറ്റം നിലക്കാതെ നോക്കാന്‍ സര്‍ക്കാര്‍ പുതിയ പദ്ധതി ആവിഷ്കരിക്കുകയാണ്. 24 മണിക്കൂറും പ്രവര്‍ത്തിക്കുന്ന നഗര മൂലകള്‍ ആദ്യം തിരുവനന്തപുരത്താണ് നടപ്പിലാക്കുക.
സംസ്ഥാന മന്ത്രിസഭയാണ് പദ്ധതിക്ക് അംഗീകാരം നല്‍കിയിരിക്കുന്നത്. ഇതനുസരിച്ച് ആദ്യം തിരുവനന്തപുരത്താണ് പദ്ധതി നടപ്പിലാക്കുക. തിരുവനന്തപുരത്തെ തിരഞ്ഞെടുത്ത നഗര മൂലകളില്‍ 24 മണിക്കൂറും കച്ചവടസ്ഥാപനങ്ങള്‍ തുറന്നു പ്രവര്‍ത്തിക്കും, ഇതിന്‍റെ ഭാഗമായി ജനങ്ങളുടെ പോക്കുവരവിനും രാത്രികാലങ്ങള്‍ ചിലവഴിക്കാനും സുരക്ഷിത റോഡുകള്‍ ഒരുക്കും.
ഏറ്റവും സുരക്ഷിതമായ രീതിയില്‍ പദ്ധതി നടപ്പിലാകുന്നു എന്ന് ഉറപ്പു വരുത്താന്‍ പൊലീസ്, ടൂറിസം, തൊഴില്‍ വകുപ്പ്, തദ്ദേശ ഭരണ വകുപ്പ്, കോര്‍പ്പറേഷന്‍ എന്നിവിടങ്ങളിലെ ഉദ്യോഗസ്ഥരുടെ ഒരു സ്ഥിരം സമിതി രൂപീകരിക്കും. 2020-ഓടെ പദ്ധതി മറ്റു നഗരങ്ങളിലേക്കും വ്യാപിപ്പിക്കും.
തിരുവനന്തപുരത്ത് നേരത്തെ ജനങ്ങളുടെ കൂട്ടായ്മകള്‍ക്ക് അവസരമൊരുക്കി വിഭാവനം ചെയ്ത മാനവീയം റോഡിന് നല്ല സ്വീകരണമാണ് ലഭിച്ചത്. പുതിയ പദ്ധതി ടൂറിസം മേഖലയില്‍ പുത്തന്‍ ചലനങ്ങളുണ്ടാക്കുമെന്നാണ് ഈ മേഖലയിലുള്ളവരുടെ പ്രതീക്ഷ.
