ഡല്‍ഹി: കര്‍ഷക ബില്ലിനെതിരെ പ്രതിപക്ഷ പ്രതിഷേധം തുടരുമെന്ന് കോണ്‍ഗ്രസ് പ്രവര്‍ത്തക സമിതി അംഗവും രാജ്യസഭാംഗവുമായ കെ.സി.വേണുഗോപാല്‍ പറഞ്ഞു. ഇന്നലെ നിര്‍ഭാഗ്യകരമായ സംഭവങ്ങളാണ് രാജ്യസഭയില്‍ ഉണ്ടായത്. ഒരു ബില്ല് അവതരിപ്പിച്ചാല്‍ അതില്‍ ഭേദഗതി നിര്‍ദ്ദേശിക്കാനും പ്രമേയം അവതരിപ്പിക്കാനും വോട്ടിംഗ് നിര്‍ദ്ദേശിക്കാനും അംഗങ്ങള്‍ക്ക് അവകാശമുണ്ട്. ഇത് നിഷേധിക്കുകയും അംഗങ്ങളെ സസ്പെന്റ് ചെയ്യുകയും ചെയ്ത നടപടി പാര്‍ലമെന്‍ററി ചരിത്രത്തിലെ കറുത്ത അധ്യായമാണെന്നും കെ.സി.വേണുഗോപാല്‍ പറഞ്ഞു. പ്രതിഷേധം ഇന്നും തുടരുമെന്നും അദ്ദേഹം വ്യക്തമാക്കി.
വന്‍കിട കോര്‍പ്പറേറ്റ് കമ്പനികള്‍ക്ക് ഒത്താശ ചെയ്യുന്ന കാര്‍ഷിക ബില്ലിനെതിരെ വിവിധ സംസ്ഥാനങ്ങളില്‍ കര്‍ഷക പ്രതിഷേധം ശക്തമാകുകയാണ്. ഈ പശ്ചാത്തലത്തില്‍ ബില്‍ സെലക്റ്റു കമ്മിറ്റിക്ക് വിടണമെന്നാണ് പ്രതിപക്ഷ ആവശ്യം. ബില്ലിനെതിരെ ബിജെപിയുടെ കര്‍ഷക മോര്ച്ചയടക്കം രംഗത്ത് വന്നിട്ടുണ്ട്. ഇതൊന്നും കണക്കിലെടുക്കാതെ എല്ലാ ജനാധിപത്യ മര്യാദകളും കാറ്റില്‍ പറത്തിക്കൊണ്ട് ബില്‍ പാസ്സാക്കിഎടുക്കാനുള്ള ശ്രമമാണ് കേന്ദ്ര സര്‍ക്കാര്‍ നടത്തിയത്. പാര്‍ലമെന്‍റംഗങ്ങളുടെ അവകാശങ്ങള്‍ക്കുമേലെയുള്ള ഈ കടന്നുകയറ്റം അംഗീകരിക്കാനാവില്ലെന്നും സസ്പെന്‍ഷന്‍ ഉണ്ടായാലും പ്രതിഷേധത്തില്‍ നിന്ന് പിന്മടങ്ങില്ലെന്നും കെ.സി.വേണുഗോപാല്‍ എംപി വ്യക്തമാക്കി.
