തനിക്ക് കോവിഡ് സ്ഥിരീകരിച്ചിരുന്നതായി തെന്നിന്ത്യൻ ചലച്ചിത്ര താരം തമന്ന ഭാട്ടിയ. ഇൻസ്റ്റാഗ്രാം പോസ്റ്റിലൂടെയാണ് താരം രോഗവിവരം പങ്കുവെച്ചത്. രോഗ ലക്ഷണങ്ങള്‍ പ്രകടമായതിനെ തുടര്‍ന്ന് കഴിഞ്ഞ ആഴ്ച സ്വയം ഹൈദരാബാദിലെ സ്വകാര്യ ആശുപത്രിയിൽ പ്രവേശിച്ചുവെന്നും, ഇപ്പോൾ ഡിസ്ചാർജ് ചെയ്തതായും താരം കൂട്ടിച്ചേർത്തു.
'ഞാനും എന്റെ ടീമും സെറ്റിൽ വളരെ കരുതലോടെയാണ് കഴിഞ്ഞിരുന്നതെങ്കിലും നിർഭാഗ്യവശാൽ കഴിഞ്ഞ ആഴ്ച ഒരു നേരിയ പനി ബാധിച്ചു. നിർബന്ധിത പരിശോധനകൾക്ക് വിധേയയാതോടെ കൊവിഡ് ആണെന്ന് വ്യക്തമായി. ആരോഗ്യപരമായ അപകടങ്ങള്‍ ലഘൂകരിക്കുന്നതിനായി ഞാന്‍തന്നെ ഹൈദരാബാദിലെ സ്വകാര്യ ആശുപത്രിയിൽ പ്രവേശിക്കുകയായിരുന്നു. കഠിനമായ ദിവസങ്ങളാണ് കടന്നു പോയത്' -തമന്ന ഭാട്ടിയ ഇൻസ്റ്റാഗ്രാം പോസ്റ്റില്‍ കുറിച്ചു.
ഇക്കഴിഞ്ഞ ആഗസ്റ്റിൽ അച്ഛനും അമ്മയും കോവിഡ് പോസിറ്റീവായ വിവരം തമന്ന തന്നെ സോഷ്യൽ മീഡിയയില്‍ പങ്കുവെച്ചിരുന്നു. നിലവിൽ തമന്നയുടെ ആരോഗ്യനില തൃപ്തികരമാണെന്നാണ് വിവരം.
