കഴിഞ്ഞ 20 വർഷത്തിനിടെ ഏറ്റവുമധികം പ്രകൃതി ദുരന്തങ്ങൾ നേരിടേണ്ടി വന്ന രാജ്യങ്ങളുടെ പട്ടികയിൽ ഇന്ത്യ മൂന്നാമത്. യുണൈറ്റഡ് നാഷൻസിന്റെ ദുരന്ത നിവാരണ സമിതി നടത്തിയ പഠനത്തിന്റെ അടിസ്ഥാനത്തിലാണ് റിപ്പോർട്ട്.
കഴിഞ്ഞ രണ്ട് വർഷങ്ങൾക്കിടെ ലോകത്ത് 3 ലക്ഷം കോടി സാമ്പത്തിക നഷ്ടം ഉണ്ടായതായി ദുരന്ത നിവാരണ സമിതി അറിയിച്ചു. ഇതിന്റെ 91 ശതമാനവും പ്രകൃതി ദുരന്തങ്ങൾ കാരണം ഉണ്ടായതാണെന്ന് സമിതി അറിയിച്ചു. 7,348 പ്രകൃതി ദുരന്തങ്ങളാണ് കഴിഞ്ഞ 20 വർഷത്തിനിടെ സംഭവിച്ചത്. ഇതിൽ 6,681ഉം കാലാവസ്ഥ വ്യതിയാനം കാരണം ഉണ്ടായ ദുരന്തങ്ങളാണ്. പത്ത് ലക്ഷത്തോളം പേരാണ് പ്രകൃതി ദുരന്തങ്ങളിൽ മരിച്ചത്.
ആഗോളതാപനം സൃഷ്ടിക്കുന്ന കാലാവസ്ഥ വ്യതിയാനങ്ങളെക്കുറിച്ചും സമിതി മുന്നറിയിപ്പ് നൽകി. കാലാവസ്ഥ വ്യതിയാനം കാരണം പ്രകൃതി ദുരന്തങ്ങൾ ഉണ്ടാകാനുള്ള സാധ്യത 83 ശതമാനമായി വർധിച്ചതായും സമിതി പറഞ്ഞു. പത്തൊൻപതാം നൂറ്റാണ്ടിൽ ഉണ്ടായിരുന്നതിനേക്കാളും മരണനിരക്ക് ഇപ്പോൾ കുറവാണെങ്കിലും സാമ്പത്തിക നഷ്ടം വളരെ വലുതാണെന്നും സമിതി ചൂണ്ടിക്കാട്ടി.