വരാനിരിക്കുന്ന ഉത്സവ സീസണ്‍ മുന്നില്‍ കണ്ട് സ്വിഫ്റ്റ് ലിമിറ്റഡ് പതിപ്പ് പുറത്തിറക്കിയിരിക്കുകയാണ് മാരുതി സുസുക്കി. വില്‍പ്പന കൂടുതല്‍ ആകര്‍ഷണമാക്കുന്നതിനും, യുവാക്കളെ ലക്ഷ്യമിട്ടും സ്‌പോര്‍ട്ടി ഭാവത്തിലാണ് വാഹനത്തിന്റെ അവതരണം. നിലവിലുള്ള മോഡലിനെക്കാള്‍ 24,990 രൂപയോളം അധികമായി നല്‍കേണ്ടിവരും.
ഗ്രില്ലിന് ചുറ്റും ബ്ലാക്ക് ട്രിം, ഗ്ലോസ് ബ്ലാക്ക് ബോഡി കിറ്റ്, എയറോഡൈനാമിക് സ്പോയിലര്‍, സൈഡ് ബോഡി മോള്‍ഡിംഗ് തുടങ്ങിയ കാര്യങ്ങളൊക്കെയാണ് പുതിയ പതിപ്പിന്റെ പ്രധാന ആകര്‍ഷണം. കൂടാതെ, എൽഇഡി ഡി‌ആർ‌എല്ലുകളുള്ള എൽഇഡി പ്രൊജക്ടർ ഹെഡ്‌ലാമ്പുകൾ, എൽഇഡി റിയർ കോമ്പിനേഷൻ ലാമ്പുകൾ, എൽഇഡി ഹൈ മൌണ്ടട് സ്റ്റോപ്പ് ലാമ്പ്, 15 ഇഞ്ച് അലോയ് വീലുകൾ, 7 ഇഞ്ച് സ്മാർട്ട്‌പ്ലേ സ്റ്റുഡിയോ ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം തുടങ്ങി ഒട്ടനവധി പുതു തലമുറ ഫീച്ചറുകളും സ്വിഫ്റ്റിന്റെ ഈ പുതിയ പതിപ്പില്‍ ഉള്‍ക്കൊള്ളിച്ചിട്ടുണ്ട്.
6,000 rpm -ല്‍ 82 bhp കരുത്തും 4,200 rpm-ല്‍ 113 Nm torque ഉം ഉത്പാദിപ്പിക്കുന്ന എഞ്ചിനാണ് വാഹനത്തില്‍. അഞ്ച് സ്പീഡ് മാനുവല്‍ അല്ലെങ്കില്‍ അഞ്ച് സ്പീഡ് ഓട്ടോമേറ്റഡ് മാനുവല്‍ ഗിയര്‍ബോക്‌സില്‍ വാഹനം ലഭ്യമാകും.
