പാട്ന: പ്രധാനമന്ത്രി നരേന്ദ്ര മോദി സൈനികരെ അപമാനിച്ചുവെന്ന് കോൺഗ്രസ് നേതാവ് രാഹുൽ ഗാന്ധി. ബീഹാറിലെ തെരഞ്ഞെടുപ്പ് റാലിയിലാണ് രാഹുൽ ഈ പരാമർശം നടത്തിയത്.
ചൈനീസ് പട്ടാളക്കാർ ഇന്ത്യയിലേക്ക് അതിക്രമിച്ച് കയറിയിട്ടില്ല എന്ന് പറഞ്ഞതിലൂടെ മോദി ഇന്ത്യൻ സൈന്യത്തെ മുഴുവൻ അപമാനിച്ചുവെന്ന് രാഹുൽ പറഞ്ഞു. ബീഹാറിലെയും ഉത്തർ പ്രദേശിലെയും യുവാക്കൾ ജീവൻ പണയം വെച്ച് രാജ്യത്തെ സംരക്ഷിക്കുമ്പോഴാണ് പ്രധാനമന്ത്രി ഇത്തരത്തിൽ സംസാരിക്കുന്നതെന്ന് രാഹുൽ കുറ്റപ്പെടുത്തി. ഇന്ത്യ-ചൈന അതിർത്തി കടന്ന് ചൈനീസ് സൈന്യം 1200 കിലോമീറ്റർ രാജ്യത്തിനകത്തേക്ക് കടന്നുകയറിയെന്നും രാഹുൽ വ്യക്തമാക്കി. ഇന്ത്യയിൽനിന്നും എന്നാണ് നിങ്ങൾ ചൈനയെ പുറത്താക്കുക എന്നും അദ്ദേഹം ചോദിച്ചു.
ബീഹാറിലെ യുവാക്കൾക്ക് 2 കോടി ജോലി എന്ന പ്രധാനമന്ത്രിയുടെ വാഗ്ദാനത്തെയും കോൺഗ്രസ് നേതാവ് ചോദ്യം ചെയ്തു. നിങ്ങളിൽ എത്ര പേർക്ക് ജോലി ലഭിച്ചു എന്നാണ് രാഹുൽ ജനങ്ങളോട് ചോദിച്ചത്. ഇതുകൂടാതെ, മോദി സർക്കാർ പ്രവർത്തിക്കുന്നത് അംബാനിക്കും അദാനിക്കും വേണ്ടിയാണെന്നും അദ്ദേഹം കുറ്റപ്പെടുത്തി. ജനങ്ങളോട് സംസാരിക്കുമ്പോൾ അദ്ദേഹം തല കുനിച്ച് വിനയത്തോടെ സംസാരിക്കുമെന്നും അത് കഴിഞ്ഞ് അദാനിക്കും അംബാനിക്കും വേണ്ടി പ്രവർത്തിക്കുമെന്നുമാണ് രാഹുൽ പറഞ്ഞത്.