ലമ്പ്രട്ട - വിഷ്ണുപ്രസാദ്

ബ്രസീലിയൻ കവി എദ്‌ഹാദ് മാഹ്ച്ചീനിയുടെ കവിത ഇദ് എന്ന കവിയുടെ ഓർമ്മയിൽ-

                               

                                                                                പ്രിയപ്പെട്ടവരേ,     

നമ്മുടെ എദ്‌ഹാദ് ഇന്നു മരിച്ചുപോകും

അവന്റെ മഞ്ഞ ലമ്പ്രട്ടയിൽ പോകുമ്പോൾ

വീട്ടിൽ നിന്ന് ആറുകിലോമീറ്റർ കഴിയുമ്പോൾ

അവന്റെ അരക്കെട്ടിൽ ഒരു തണുപ്പുതോന്നും

അവന്റെ എട്ടുവയസ്സുള്ള മരിയയുടെ തണവുള്ള

കുഞ്ഞുകൈകളാണതെന്ന് അവൻ തിരിച്ചറിയും


നാലുവർഷം മുൻപ് മരിച്ചുപോയവൾ

അവനെ ചുറ്റിപ്പിടിച്ചിരിക്കുന്നു

അവൾ അവന്റെ കാതിൽ പറയും

പപ്പാ വേഗമാവട്ടെ പപ്പാ

നമ്മുടെ മുന്നിൽ പോകുന്ന മൂന്ന് ലമ്പ്രട്ടകളെയും

മറികടക്കൂ പപ്പാ

അവൻ മൂന്ന് ലമ്പ്രട്ടകളെയും മറികടക്കും

അവളുടെ ചിരിയും കിളിയൊച്ചയും

അവനെ ആവേശഭരിതനാക്കും


പ്രിയപ്പെട്ടവരേ

നിങ്ങൾക്കറിയാമല്ലോ

കഴിഞ്ഞ നാലുവർഷവും നമ്മുടെ എദ്‌ഹാദ്

അവന്റെ കട തുറന്നതേയില്ല

അവൻ അവന്റെ മഞ്ഞ ലമ്പ്രട്ടയിൽ

ഈ സാവോപോളോ മുഴുവൻ അലഞ്ഞു

അവന്റെ കുഞ്ഞുമകൾ പോയതിൽപ്പിന്നെ

അവന്റെ മനസ്സു തെറ്റിപ്പോയി.

അവൾ പിൻ‌സീറ്റിലുണ്ടെന്ന തോന്നലുണ്ടാവാൻ

അവൾ ഇല്ലാതായിട്ടില്ലെന്ന് തന്നെത്തന്നെ വിശ്വസിപ്പിക്കാൻ

രാവും പകലുമില്ലാതെ അയാൾ പാഞ്ഞു.


നാലുകൊല്ലം മുൻപത്തെപ്പോലെ

അവന്റെ കുഞ്ഞുമരിയ അവനോടിന്നും പറയും

പപ്പാ പപ്പാ എല്ലാ വണ്ടികളും വെട്ടിച്ചുപോ

പപ്പാ പപ്പാ നമുക്ക് ഏറ്റവും മുന്നിലെത്തണം പപ്പാ

പപ്പാ പപ്പാ സാവോപോളയിലേക്ക് പോകുന്ന 

ആ ടാങ്കർ ലോറിയെ പിന്നിലാക്കൂ പപ്പാ

എദ്‌ഹാദ് എല്ലാ വാഹനങ്ങളേയും കടക്കും.


അവനും അവന്റെ  മകളുംകൂടി ആ മഞ്ഞ ലമ്പ്രട്ടയിൽ

വേഗതയും സന്തോഷവും വാരിവിതറി കടന്നുപോവും

ട്രക്കുകളെ ലോറികളെ ബസ്സുകളെ കാറുകളെയെല്ലാം

അത് കുഞ്ഞുകുരുവിയെപ്പോലെ കടന്നുപോകും

ചോളവയലുകളിൽ പണിയെടുക്കുന്ന പരിചയക്കാർ

എദ്‌ഹാദ് എദ്‌ഹാദ് നീ നിന്റെ കുഞ്ഞുമകളെയും കൊണ്ട്

മരിക്കാൻ പോവുകയാണോ എന്ന് വിളിച്ചുചോദിക്കും.

വഴിയരികിൽ നിൽക്കുന്നവരെല്ലാം എന്താണ്

കടന്നുപോയതെന്നറിയാതെ

പോയ ദിശയിലേക്ക് ഞെട്ടലോടെ നോക്കും


പ്രിയപ്പെട്ടവരേ നിങ്ങൾക്കറിയാമല്ലോ

നാലുവർഷം മുൻപ് അവന്റെ കുഞ്ഞുമകളെ സ്കൂളിൽ

കൊണ്ടുപോകുമ്പോൾ

ഈ കരിമ്പുകാട്ടിൽ നിങ്ങൾ കരിമ്പുവെട്ടുകയായിരുന്നു

കരിമ്പുകയറ്റിയ ഒരു ലോറി പാടത്തുനിന്ന്

റോഡിലേക്ക് കയറുകയായിരുന്നു

വേഗത കൂട്ടി അവനും മോളും ലമ്പ്രട്ടയിൽ പറക്കുകയായിരുന്നു

പെട്ടെന്നാണ് ഒരു കുറുക്കൻ റോഡുമുറിച്ചുകടന്നത്

അതേ കുറുക്കൻ ഇന്ന് ഈ റോഡ് മുറിച്ചുകടക്കും

അന്ന് കുഞ്ഞുമരിയ തെറിച്ചുവീണിടത്ത് 

നമ്മുടെ എദ്‌ഹാദ് തെറിച്ചുവീഴും


അതാ വരുന്നു, അവന്റെ ലമ്പ്രട്ട

പിന്നിൽ അവന്റെ കുഞ്ഞുമരിയ അവനെ ആവേശപ്പെടുത്തുന്നു.

വേഗമാവട്ടെ പപ്പാ വേഗം 

ആ കരിമ്പുലോറിയെ മറികടക്കൂ പപ്പാ

കരിമ്പുലോറി റോട്ടിലേക്ക് കയറിക്കഴിഞ്ഞു.

എദ്‌ഹാദ് വേഗത കൂട്ടി കരിമ്പുലോറിയെ കടക്കുന്നു

കരിമ്പുകാട്ടിൽനിന്ന് കുതിച്ചുവരുന്നൂ

ആ പഴയ കുറുക്കൻ

തീർച്ചയായും, എദ്‌ഹാദിന്റെ വണ്ടി ഇന്ന് 

ആ കുറുക്കനെ ഇടിച്ചുതെറിച്ചുവീഴും

നമ്മുടെ എദ്‌ഹാദ് ഇന്നുമരിക്കും

അവന്റെ കുഞ്ഞുമരിയ അവനെ കൊണ്ടുപോകും.

Contact the author

Vishnu Prasad

Recent Posts

Sajeevan Pradeep 4 weeks ago
Poetry

പെൺ ന്യൂട്ടൺ - സജീവന്‍ പ്രദീപ്‌

More
More
Shaju V V 4 weeks ago
Poetry

കൊലയ്ക്കും കൊലചെയ്യപ്പെടുന്നതിനും ഇടയില്‍ - ഷാജു വി വി

More
More
Sajeevan Pradeep 1 month ago
Poetry

സോളാർ പാടം - സജീവന്‍ പ്രദീപ്‌

More
More
Sajeevan Pradeep 1 month ago
Poetry

നാല് ഇലക്ട്രിക് പോസ്റ്റുകളുടെ ആത്മകഥ - സജീവന്‍ പ്രദീപ്‌

More
More
Sooraj Kalleri 1 month ago
Poetry

ടാക്സി ഡ്രൈവർ - സൂരജ് കല്ലേരി

More
More
Sajeevan Pradeep 2 months ago
Poetry

യാത്ര - സജീവന്‍ പ്രദീപ്‌

More
More