കര്താര്പൂര് ഇടനാഴി വീണ്ടും തുറക്കുമെന്ന് വിദേശകാര്യ മന്ത്രാലയം .ഗുരു നാനാക്ക് ജയന്തിയ്ക്ക് മുന്നോടിയായാണ് തീരുമാനം. പാക് അധീന പഞ്ചാബിലെ ഗുരുദ്വാര ദര്ബാര് സാഹിബും ഗുരുദാസ്പൂരിലുളള ദേരാ ബാബാ നാനാക്ക് ഗുരുദ്വാരയും പരസ്പരം ബന്ധിപ്പിച്ച് ഇന്ത്യയിലെ തീര്ഥാടകര്ക്ക് സന്ദര്ശനം സാധ്യമാക്കുന്ന ഇടനാഴിയാണ് കര്താര്പൂര് ഇടനാഴി.
കൊവിഡ് മാനദണ്ഡങ്ങള് അനുസരിച്ചായിരിക്കും ഇടനാഴി തുറക്കുക. കൊവിഡ് ഭീഷണി കാരണം കര്താര്പൂര് ഇടനാഴി അടച്ചിരിക്കുകയായിരുന്നു ബന്ധപ്പെട്ട അധികാരികളുമായി കൂടിയാലോചനയ്ക്കു ശേഷം മാത്രമേ തുറക്കൂ എന്നും വിദേശകാര്യ വക്താവ് അനുരാഗ് ശ്രീവാത്സവ വ്യക്തമാക്കി. ഒക്ടോബര് 2 ന് ദേരാ ബാബ നാനാക്ക് സാഹിബിനെയും കര്താര്പൂറിലെ ഗുരുദ്വാരദര്ബാറിനെയും ബന്ധിപ്പിക്കുന്ന 4.7കിലോമീറ്റര് നീളമുളള പാത തുറക്കുന്നതായി പാക്കിസ്ഥാന് സര്ക്കാര് പ്രഖ്യാപിച്ചിരുന്നു. കഴിഞ്ഞ വര്ഷമാണ് ഈ ഇടനാഴിയുടെ ഉദ്ഘാടനം കഴിഞ്ഞത്.
കൊവിഡ് മഹാമാരിയുടെ പശ്ചാത്തലത്തില് ഇന്ത്യന് ഗവണ്മെന്റ് കര്താര്പുര് ഇടനാഴി മാര്ച്ചില് അടച്ചുപൂട്ടുകയായിരുന്നു. പാക്ക് ഗവണ്മെന്റും പാക്കിസ്ഥാനികള് കര്താര്പൂര് വഴി യാത്ര ചെയ്യുന്നതിന് നിരോധനം ഏര്പ്പെടുത്തിയിരുന്നു.