വാഷിംഗ്ടണ്: കുടിയേറ്റക്കാരെ തടയുക എന്ന ലക്ഷ്യത്തോടെ യു എസ് പ്രസിഡന്റ് ഡോണല് ട്രംപ് നടപ്പാക്കിയ ഭരണ പരിഷക്കാരങ്ങളില് പ്രധാനപ്പെട്ട എച്ച് -1 ബി വിസാ നിയന്ത്രണം യു എസ് കോടതി തടഞ്ഞു. ഈ മാസം 7 ന് നിലവില് വരും വിധം നടപ്പാക്കാനിരുന്ന വിസാ നിയന്ത്രണമാണ് വടക്കന് കാലിഫോര്ണിയയിലെ യു എസ് ഡിസ്ട്രിക്റ്റ് കോടതി തടഞ്ഞത്.
അമേരിക്കന് കമ്പനികള് എച്ച് -1 ബി വിസാ പ്രകാരം വിദേശത്തു ജോലിക്കാരെ കൊണ്ടുവരുന്ന പക്ഷം കൂടുതല് ശമ്പളവും ആനുകൂല്യങ്ങളും നല്കണമെന്ന് വ്യവസ്ഥപ്പെടുത്തുന്നതാണ് ഈ മാസം നടപ്പാക്കാനിരുന്ന എച്ച് -1 ബി വിസാ നിയന്ത്രണ നിയമം. ഇത് നടപ്പാക്കുന്നത് വഴി അമേരിക്കന് കമ്പനികള് ചെലവ് താങ്ങാനാവാതെ വിദേശ ജോലിക്കാരെ കൊണ്ടുവരുന്നതില് നിയന്ത്രനമേര്പ്പെടുത്തും എന്നായിരുന്നു ഡോണല് ട്രംപ് സര്ക്കാരിന്റെ നിഗമനം. ഇതിലൂടെ കുടിയേറ്റക്കാരെ നിയന്ത്രിക്കാമെന്നും സര്ക്കാര് കണക്കുകൂട്ടി. ഈ കണക്കുക്കൂട്ടലുകള്ക്കാണ് ഇപ്പോള് കോടതിയില് നിന്ന് തിരിച്ചടിയേറ്റിരിക്കുന്നത്.
കൊവിഡ് കാരണമുള്ള തൊഴിലില്ലായ്മ എച്ച് -1 ബി വിസ സംബന്ധിച്ച നിയമത്തില് ഭേദഗതി വരുത്താനുള്ള മതിയായ കാരണമല്ലെന്ന് വടക്കന് കാലിഫോര്ണിയയിലെ യു എസ് ഡിസ്ട്രിക്റ്റ് കോടതി ജഡ്ജി ജെഫ്രി വൈറ്റ് തന്റെ ഉത്തരവില് വ്യക്തമാക്കി.
എച്ച് -1 ബി വിസയുള്ള ആറു ലക്ഷത്തിലധികം പേര് ഇപ്പോള് അമേരിക്കയിലെ വിവിധ സംസ്ഥാനങ്ങളിലായി ജോലിയെടുക്കുന്നുണ്ട്. ഇവരില് ഏറിയ പങ്കും ഇന്ത്യാക്കാരും ചൈനീസ് പൌരന്മാരുമാണ്. പുതിയ കോടതി വിധി അവര്ക്ക് ആശ്വാസം പകരുന്നതാണ്.
അമേരിക്കയിലെ ചേമ്പര് ഓഫ് കൊമേഴ്സ്, ഗൂഗിള്, ഫേസ് ബുക്ക്, സ്റ്റാന്ഫോഡ് യുണിവേഴ്സിറ്റി തുടങ്ങിയ സ്ഥാപനങ്ങളും സംഘടനകളുമാണ് ഡോണല് ട്രംപിന്റെ എച്ച് -1 ബി വിസാ നിയന്ത്രണ നടപടിക്കെതിരെ യു എസ് കോടതിയെ സമീപിച്ചത്.
പ്രതിവര്ഷം അമേരിക്ക 85,000 പുതിയ എച്ച് -1 ബി വിസകളാണ് വിദേശി ഉദ്യോഗാര്ഥികള്ക്കായി അനുവദിക്കുന്നത്. ഇതില് ഏകദേശം 70 ശതമാനവും ഇന്ത്യന് കുടിയേറ്റക്കാരാണ് നേടിയിരുന്നത്. ഇക്കാരണത്താല് ഇന്ത്യയില് നിന്നുള്ള കുടിയേറ്റക്കാരേയും അമേരിക്കന് ജോബ് വിസ പ്രതീക്ഷിച്ചിചിരിക്കുന്നവരെയും പ്രത്യക്ഷത്തില് ബാധിക്കുമായിരുന്ന നിയമ ഭേദഗതിയാണ് ഇപ്പോള് യു എസ് ഡിസ്ട്രിക്റ്റ് കോടതി തടഞ്ഞത്.