പാലക്കാട്: ജമാഅത്തെ ഇസ്ലാമിയും ആര്‍ എസ് എസിനെപ്പോലെ മതരാഷ്ട്രവാദികള്‍ ആണെന്നും ജമാഅത്തെ ഇസ്ലാമിയെ എതിര്‍ക്കാത്തവര്‍ക്ക് ആര്‍ എസ് എസിനെ എതിര്‍ക്കാനാവില്ലെന്നും സാംസ്കാരിക മന്തി എ കെ ബാലന്‍ പറഞ്ഞു.ഐക്യ ജനാധിപത്യ മുന്നണിയുടെ ജമാഅത്തെ ഇസ്ലാമിയുമായുള്ള തെരഞ്ഞെടുപ്പ് സഖ്യം അവരെ വലിയ വീഴ്ച്ചയിലെത്തിക്കുമെന്നും മന്തി എ കെ ബാലന്‍ പറഞ്ഞു. ഇടതുമുന്നണി തെരഞ്ഞെടുപ്പ് പൊതുയോഗത്തില്‍ വടക്കാഞ്ചേരിയില്‍ സംസാരിക്കുകയായിരുന്നു മന്ത്രി.
ജമാഅത്തെ ഇസ്ലാമിയുമായുള്ള തെരഞ്ഞെടുപ്പ് സഖ്യത്തില്‍ ഐക്യ ജനാധിപത്യ മുന്നണിക്കകത്ത് അഭിപ്രായ ഐക്യമില്ലെന്നും നേതാക്കന്മാര്‍ ഇക്കാര്യത്തില്‍ തമ്മില്‍ തല്ലുകയാണെന്നും മന്ത്രി ബാലന്‍ ആരോപിച്ചു. ഐക്യ ജനാധിപത്യ മുന്നണി അധികാരത്തില്‍ വന്നാല്‍ ജമാഅത്തെ ഇസ്ലാമിയും ഭരണത്തില്‍ പങ്കാളികളാകുന്ന സ്ഥിതിയാണ് വന്നു ചേരുക. ഇത് അത്യന്തം അപകടകരമാണ്. ലീഗ് പ്രവര്‍ത്തകരാരും അംഗീകരിക്കാത്ത ഈ ബന്ധത്തിലൂടെ ആര്‍ എസ് എസിനെ വിമര്‍ശിക്കാനുള്ള ധാര്‍മ്മിക ശേഷിയാണ് യു ഡി എഫിന് നഷ്ടപെട്ടത് എന്നും മന്ത്രി ബാലന്‍ ആരോപിച്ചു.
