ഇസ്ലാമാബാദ്: പാക്കിസ്ഥാനിലെ പെഷവാറില് ഓക്സിജന് ക്ഷാമം മൂലം ആറു പേര്ക്ക് ജീവന് നഷ്ടമായി. അഞ്ച് കൊവിഡ് രോഗികളടക്കം ആറുപേരാണ് പെഷവാറിലെ ആശുപത്രിയില് ഓക്സിജന് വിതരണം കുറഞ്ഞതിനെ തുടര്ന്ന് മരിച്ചത്. സംഭവത്തില് ഓക്സിജന് വിതരണ കമ്പനിയെ കുറ്റപ്പെടുത്തി ആശുപത്രി അധികൃതര് രംഗത്തുവന്നു.
ശനിയാഴ്ച്ച വൈകുന്നേരമാണ് പുതിയ ഓക്സിജന് സിലിണ്ടറുകള് വിതരണം ചെയ്യാത്തതിനെത്തുടര്ന്ന് ഖൈബര് ടീച്ചിംഗ് ഹോസ്പിറ്റലില് രോഗികള് മരിച്ചത്. മുന്നൂറ് ബാക്കപ്പ് സിലിണ്ടറുകള് ഉണ്ടായിരുന്നെങ്കിലും വെന്റിലേറ്ററുകളിലേക്കാവശ്യമായ അളവില് ഓക്സിജന് നല്കാന് കഴിഞ്ഞില്ല. ഓക്സിജന് വിതരണം കുറഞ്ഞതോടെ രോഗികള് മരിക്കുകയും നിരവധിപേരുടെ നില ഗുരുതരമാവുകയും ചെയ്യുകയായിരുന്നു. ഓക്സിജന് സിലിണ്ടര് വിതരണം അവതാളത്തിലായത്തോടെ രോഗികളുടെ ബന്ധുക്കളോട് സ്വയം ഓക്സിജന് സിലിണ്ടറുകള് വാങ്ങാന് ആശുപത്രി അധികൃതര് ആവശ്യപ്പെട്ടത് വലിയ പ്രതിഷേധത്തിന് കാരണമായി.
പ്രധാന വാര്ത്തകള് മാത്രം ടെലഗ്രാമില് ലഭിക്കാന് ഈ ലിങ്ക് ക്ലിക്ക് ചെയ്യുക
അതേസമയം ഞായറാഴ്ച്ച വൈകുന്നേരത്തോടെ ഓക്സിജന് സിലിണ്ടറുകള് ആശുപത്രിയില് എത്തിയെന്ന് അധികൃതര് അറിയിച്ചു. ആശുപത്രിയില് ആവശ്യമായ അളവില് ഓക്സിജന് ലഭിക്കാതിരുന്നതാണ് രോഗികളുടെ മരണത്തിലേക്ക് നയിച്ചത്. ഇതുസംബന്ധിച്ച് വിശദമായ അന്വേഷണങ്ങള്ക്ക് ഉത്തരവിട്ടിട്ടുണ്ട് എന്ന് ഖൈബര് സംസ്ഥാന മന്ത്രി തൈമൂര് സലീം ജാഗ്ര അറിയിച്ചു. കൊവിഡ് വ്യാപനത്തെ തുടര്ന്ന് വലിയ പ്രതിസന്ധികളിലൂടെയാണ് പാകിസ്താന് കടന്നു പോകുന്നത്. 8000 പേരാണ് കൊവിഡ് ബാധിച്ച് ഇതുവരെ പാക്കിസ്ഥാനില് മരിച്ചത്.